MPJ e Serbisë: Duke u mbështetur në Rezolutën 1244, Serbia mbron rregullat universale që duhet të vlejnë për të gjithë

Në këtë ditë të vitit 1999, Këshilli i Sigurimit i Kombeve të Bashkuara miratoi Rezolutën 1244, me të cilën konfirmohet sovraniteti dhe integriteti territorial i Republikës Federale të Jugosllavisë, dhe kështu edhe i Republikës së Serbisë si pasardhëse e saj ligjore, thuhet në njoftimin e Ministrisë së Punëve të Jashtme të Serbisë.

Siç thuhet, Rezoluta 1244 është miratuar “në kontekstin e përfundimit të konfliktit në Kosovë dhe Metohi, me mandat për të siguruar praninë e Kombeve të Bashkuara, kthimin e refugjatëve dhe të personave të zhvendosur dhe respektimin e plotë të sovranitetit dhe integritetit territorial të Republikës së Serbisë”.

“Republika e Serbisë në mënyrë të qëndrueshme respekton të drejtën ndërkombëtare, parimet e Kartës së OKB-së dhe themelet e rendit ndërkombëtar. Jemi krenarë që i përkasim shteteve që janë të përkushtuara ndaj respektimit të këtyre parimeve, përfshirë domosdoshmërinë për të respektuar integritetin territorial dhe sovranitetin, si të vetin, ashtu edhe të të gjitha shteteve anëtare të tjera”, thuhet në njoftim.

MPJ shton se në luftën për ruajtjen e sovranitetit dhe integritetit të saj territorial, Serbia mbështetet në Rezolutën 1244, duke mbrojtur kështu rregulla universale që duhet të vlejnë në mënyrë të barabartë për të gjithë.