Odalloviq: Pala jonë e respektoi marrëveshjen e nënshkruar me mirëbesim, ndryshe nga Prishtina

Kryetari i Komisionit të Qeverisë së Serbisë për Persona të Zhdukur, Velko Odalloviq, thotë se pret që presidenti serb sonte të prezantojë më shumë detaje nga bisedimet me përfaqësuesit ndërkombëtarë, si dhe të përsërisë vijat e kuqe të Beogradit në Ohër, transmetoi RTS.

"Pala jonë e respektoi atë që ishte nënshkruar në mirëbesim, për dallim nga Prishtina. Sikur të ishte formuar BKS, të gjithë do t'i gëzonin përfitimet", tha Odalloviq.

Dy ditë para takimit në Ohër, janë mbajtur takime të shumta në nivelin më të lartë - dje në Beograd ka mbërritur sekretari amerikan i shtetit dhe i dërguari i posaçëm për Ballkanin Perëndimor Gabriel Eskobar, e më parë Miroslav Lajçak ka qëndruar në Beograd dhe Prishtinë.

Odalloviq pret që presidenti Vuçiq sonte të njoftojë më shumë detaje rreth bisedimeve me përfaqësuesit ndërkombëtarë.

“Nuk ka shumë, përveç informacioneve të përgjithshme, njoftimeve, mesazheve, por ajo që pres është që vijat tona të kuqe të përsëriten në Ohër”, tha Odalloviq.

Ai beson se bashkësia ndërkombëtare është afër të kuptojë se është e nevojshme që fillimisht të formohet BKS dhe në çfarë kanë sjellë dhjetë vjet mosveprim dhe shmangie.

“Ishim në prag të konflikteve të rënda potenciale, edhe pse nuk i provokuam dhe Kurti po me lëvizje të ndryshme, militarizimin e veriut të krahinës sonë jugore, arrestimet, ngacmimet dhe gjithçka që kaluam, tregoi se ishte gati për konflikte më serioze, që disa nga planet e tij të arrijnë qëllimin dhe të vendosin kontroll të plotë mbi veriun”, tha Odalloviq.

Ai pret që presidenti të insistojë në qëndrimet e Beogradit dhe për një gjë të tillë të marrë mbështetjen e zyrtarëve ndërkombëtarë.

Përfshirja e SHBA-së i dha forcë të re

Odalloviq thekson se përfshirja e SHBA-së dhe përfaqësuesit të saj të lartë tregon se ka një erë të re, një forcë të re, si dhe një dokument që hapi procesin për një dialog të ri, dhe se komuniteti ndërkombëtar vendosi ta detyrojë Prishtinën të përmbushë obligimet e saj.

“Evropa ishte e pafuqishme, Prishtina e injoroi dialogun e udhëhequr nga zyrtarë ndërkombëtarë dhe refuzimi i tyre për të diskutuar diçka tjetër përveç njohjes ndërkombëtare ishte i papranueshëm për ne”, tha Odalloviq.

Ai thekson se Marrëveshja e Brukselit e vitit 2013, Plani i zbatimit nga viti 2015, si dhe obligimet që janë kontraktuar para vitit 2013, është dashur të ndihmojnë edhe serbët edhe shqiptarët, e jo vetëm t'i zgjidhin problemet e serbëve.

"Serbia e respektoi atë që ishte nënshkruar me mirëbesim, dhe Prishtina nuk donte të përmbushte asgjë. Bashkësia ndërkombëtare nuk kishte asnjë mënyrë ose nuk donte ta detyronte Prishtinën të përmbushte detyrimet e saj. Sikur të ishte formuar BKS, të gjithë do t'i gëzonin përfitimet“, tha Velko Odalloviq.