Pantoviq për procesin kundër Pantiqit: Nuk ka prova kundër tij, prokuroria po ecën në errësirë

Avokati i Dejan Pantiqit, i cili u lirua sot për t'u mbrojtur, Lubomir Pantoviq tha për Kosovo online se arresti shtëpiak i Pantiqit zgjati jashtëzakonisht shumë dhe se nuk ka prova konkrete kundër klientit të tij.

“Më në fund, një lajm i mirë, arresti shtëpiak i Dejan Pantiqit zgjati një kohë jashtëzakonisht të gjatë, është një lloj precedenti në praktikën gjyqësore, të paktën këtu në Kosovë, ku arresti shtëpiak zakonisht zgjat një ose dy muaj dhe nëse i pandehuri e respekton, lirohet ose caktohet masë më e lehtë”, shpjegon Pantoviq.

Ai kujton se në rastin e Pantiqit arresti shtëpiak ka zgjatur tetë muaj.

“Dua t'ju kujtoj se edhe para arrestit shtëpiak, Dejan Pantiq ishte, siç do ta quaja, në paraburgim në kontejnerë, sepse ishte ndaluar në vendkalimin administrativ Jarinjë. Kjo është kërkesa e tretë për anulimin e arrestit shtëpiak ndaj tij dhe më në fund Prokuroria Speciale e Kosovës dhe gjykata treguan mirëkuptim dhe masa e arrestit shtëpiak iu zëvendësua me masën e kushtit”, thotë avokati.

Ai shton se familja e Dejan Pantiqit ka depozituar një shumë të caktuar parash si garanci, siç thotë, se ai nuk do të ikë dhe se do të jetë në dispozicion të gjykatës në rrjedhën e mëtutjeshme të gjykimit.

“Procedura penale kundër tij është ende në vazhdim, ai ka obligim që t’i përgjigjet të gjitha ftesave të gjykatës, por ai është i lirë për momentin dhe mund të lëvizë, nuk ka kufizime për lirinë e lëvizjes”, thekson Pantoviq.

Avokati thotë se rasti është intensifikuar para disa muajsh me arrestimin e fundit për atë ngjarje, për të cilën dyshohet dhe akuzohet Dejan Pantiq.

“Do të thoja se hetimi është ende në fazën fillestare, edhe pse kundër Pantiqit është nisur më 11 dhjetor të vitit të kaluar, por për shkak të këtyre arrestimeve të reja, mendoj se Prokuroria është kthyer pak pas dhe do të thosha se janë duke ecur në errësirë. Të paktën nuk ka asnjë provë konkrete ndaj Dejan Pantiqit, sepse po të kishte pasur në këta tetë muaj do të kishte aktakuzë apo ndonjë veprim tjetër nga prokuroria. Kështu jam mesatarisht optimist për rrjedhën e mëtejshme të procedurës penale," theksoi Pantoviq.