Pavkoviq: Qeveria e re ndoshta deri në mars, gjithçka varet nga shpallja e rezultateve përfundimtare të zgjedhjeve

Drejtori i strategjisë në Qendrën për Politika Evropiane në Beograd, Millosh Pavkoviq, thotë për Kosovo online se nuk mund të përcaktohet saktë se në çfarë afati Kosova duhet të marrë një qeveri të re pas zgjedhjeve të 28 dhjetorit, sepse shpallja e rezultateve përfundimtare mund të zvarritet, ashtu siç ndodhi pas zgjedhjeve të 9 shkurtit. Duke folur në mënyrë të përafërt, ai vlerëson se qeveria duhet të zgjidhet deri në muajin mars.

Pavkoviq thekson se vendimet e Gjykatës Kushtetuese të marra muajve të fundit, në lidhje me afatet dhe mënyrën e zgjedhjes së kryetarit të Kuvendit të Kosovës, kanë zgjidhur disa çështje, por disa të tjera kanë mbetur të hapura.

“E hapur ka mbetur çështja e zgjedhjes së nënkryetarit, sepse nuk është dhënë përgjigje në ankesën e Listës Serbe, duke pasur parasysh se për nënkryetar u zgjodh Nenad Rashiq, i cili nuk mori mbështetjen e Listës Serbe. Gjykata Kushtetuese nuk është deklaruar dhe gjasat janë që as nuk do të deklarohet, pasi po hyjmë në një cikël të ri zgjedhjesh parlamentare. Potencialisht i njëjti skenar mund të ndodhë edhe pas zgjedhjeve të reja, e më pas sërish do të kërkohet mendimi i Gjykatës Kushtetuese”, thekson Pavkoviq.

Sipas llogarive të tij, rezultatet përfundimtare të zgjedhjeve duhet të shpallen në fillim ose në mesin e janarit, por ai thekson se duhet marrë parasysh mundësia e ankesave, të cilat mund të shtyjnë shpalljen e rezultateve.

Për konstituimin e Kuvendit dhe zgjedhjen e kryetarit dhe nënkryetarëve, afati është i përcaktuar qartë, ndërsa nga konstituimi i Kuvendit deri te zgjedhja e qeverisë afati është shumë i shkurtër.

“Partia që ka fituar më shumë vota ka 15 ditë afat për formimin e qeverisë dhe nëse nuk arrin ta formojë, mandatin dhe 15 ditë të tjera i jepen partisë së dytë të renditur, ose potencialisht, siç ndodhi tani, një mandatari tjetër nga partia që fitoi zgjedhjet. Nëse nuk vjen deri te zgjedhja e qeverisë, atëherë vendi shkon në zgjedhje të jashtëzakonshme. Në thelb, kuadri kohor për zgjedhjen e qeverisë është 60 deri në 90 ditë, që do të thotë fillimi i pranverës, muaji mars 2026, por kjo mund të ndryshojë kryesisht për shkak të përcaktimit të rezultateve përfundimtare”, vlerëson Pavkoviq.