Petkoviq: Kurti dëshiron t’ia heqë të drejtat popullit serb, çështja e deeskalimit është prioritet

Drejtori i Zyrës për Kosovën dhe Metohinë, Petar Petkoviq, thekson se Kryeministri i Kosovës në mandatin teknik, Albin Kurti, dëshiron të përjashtojë praninë e shtetit serb dhe t'ia heqë të drejtat popullit serb duke mbyllur Listën Serbe, si dhe të maskojë dështimin e tij në zgjedhje duke mbyllur institucionet serbe.

Petkoviq, gjatë një paraqitjeje mysafire në Dnevnik të RTS-së, theksoi se në mbledhjen e Këshillit të Sigurisë Kombëtare të udhëhequr nga Komandanti i Përgjithshëm dhe presidenti i Serbisë, Aleksandar Vuçiq, janë diskutuar çështje që lidhen drejtpërdrejt me çështjen e sigurisë kombëtare dhe ruajtjen e interesave shtetërore dhe kombëtare.

Ai shtoi se, kur bëhet fjalë për paqen në rajon, është biseduar edhe për situatën në Bosnjë e Hercegovinë dhe për pozitën e Republikës Sërpska, e cila sipas tij është ndjeshëm e vështirësuar.

„Po ashtu, është biseduar edhe për situatën në Kosovë, për pozitën e rëndë të popullit serb dhe për sulmet e përditshme të autoriteteve në Prishtinë, si dhe për veprimet njëanshme dhe eskaluese të Albin Kurtit, i cili është gjithnjë e më nervoz për shkak se nuk po arrin të formojë qeverinë, e as kuvendin“, shpjegoi Petkoviq.

Ai thekson se ky është mënyra e Kurtit për të fshehur dështimin në zgjedhje.

Petkoviq thekson se Kurti ka tri synime me mbylljen e institucioneve serbe në Kosovë:

„Së pari, ai dëshiron që përmes kësaj të dëbojë praninë e shtetit të Serbisë nga territori i Kosovës dhe Metohisë. Së dyti, dëshiron ta zhvesh nga të drejtat popullin serb, duke pasur parasysh që bëhet fjalë për institucionet më të rëndësishme serbe që ofrojnë shërbime vitale, dhe mbyllja e tyre lidhet drejtpërdrejt me çështjen e të drejtave themelore të njeriut në Kosovë, të cilat Kurti i shkel vazhdimisht. Së treti, ai dëshiron ta zhvesh nga të drejtat politike popullin serb përmes përpjekjes për shuarjen e Listës Serbe“, tha Petkoviq dhe kujtoi deklaratën e Kurtit se është humbur një rast historik për të shuar Listën Serbe dhe për t’u dhënë hapësirë Nenad Rashiqit dhe partive tjera serbe.

Petar Petkoviq thekson se partitë serbe që dëshiron Albin Kurti nuk kujdesen për interesin e popullit serb dhe të Beogradit, por për interesat e Prishtinës.

„Kjo mbyllje e institucioneve serbe është tregues se Kurti nuk dëshiron dialog, nuk dëshiron popull serb në Kosovë dhe Metohi, sepse ai udhëhiqet nga maksima se nëse nuk ka popull serb, nuk ka as problem. Me shuarjen e institucioneve serbe që është dashur të jenë baza dhe themeli për formimin e Bashkësisë së Komunave Serbe, Kurti dëshiron të thotë se nuk ka nevojë për formimin e BKS-së, të cilën e presim tashmë 12 vjet, dhe për të cilën insistojmë në dialog, por edhe në bisedimet me BE-në, që të realizohet dhe që dikush më në fund ta detyrojë Albin Kurtin të përmbushë obligimet e tij“, tha Petkoviq.

I pyetur se kush është ai që do ta detyrojë Kurtin të përmbushë detyrimet e tij, Petkoviq thekson se së pari duhet parë se çfarë po bën BE-ja për të ushtruar presion ndaj Kurtit në mënyrë që të ndalet persekutimi i popullit serb në Kosovë.

„Edhe pse kemi hapur tema të rëndësishme në dialog, kërkojmë që në rend dite të jetë deeskalimi, sepse pa të nuk ka të drejta themelore të njeriut për serbët në Kosovë. Pa të, do të kemi vazhdim të hyrjeve të forcave speciale të Kurtit në institucionet serbe. Si mund të vazhdohet dialogu kur në terren po ndryshohet realiteti? Nëse Kurti sillet ashtu dhe tregon qartë çfarë mendon për serbët, atëherë deeskalimi duhet të jetë prioriteti numër një. 'Status quo ante' nënkupton kthim në gjendjen e mëparshme, ku duhet të bisedojmë për çështjen e institucioneve tona në Kosovë dhe Metohi dhe për të gjitha çështjet që lidhen me të drejtat e popullit serb në Kosovë dhe Metohi“, shpjegon Petkoviq.

Ai shton se Perëndimi nuk reagon kur mbyllen institucionet serbe.

Duke komentuar deklaratën e përfaqësueses së lartë të BE-së, Kaja Kallas, se deeskalimi i situatës në veri është kusht për heqjen e masave ndaj Kosovës, Petkoviq thekson se ato masa nuk janë as të vërteta.

„Nëse ky është kushti për heqjen e masave ndaj Kosovës, atëherë shihet që ato nuk janë të vërteta, sepse po të ishin, Kurti do të ndalte sulmet ndaj serbëve dhe institucioneve. Është e qartë se nëse Kurti e bën këtë çdo ditë, do të thotë se ka përkrahjen e dikujt“, thotë Petkoviq dhe shton se nuk është për t’u habitur që ka reaguar ndaj deklaratës së ambasadorit të Gjermanisë në Prishtinë, Jorn Rode, i cili ka thënë se institucionet serbe duhet të mbyllen.

„Këto nuk janë disa institucione paralele siç thotë Rode, por janë institucione legale dhe legjitime të shtetit të Serbisë në Kosovë dhe Metohi. Mirë është që më në fund e dimë kush qëndron pas Kurtit dhe këtyre veprimeve. Që në fillim ka qenë e qartë se Kurti nuk ka forcë që ta bëjë këtë i vetëm. Problemi është se bashkësia ndërkombëtare përdor standarde të dyfishta, Kurti përkëdhelet, i mbyllen sytë ndaj asaj që bën Prishtina. Kur është fjala për Beogradin, kur thonë se të dyja palët janë përgjegjëse, ju e dini që gjithmonë përgjegjësia bie mbi Prishtinën, sepse ne e kemi përmbushur pjesën tonë. Gjithmonë duhet ndëshkuar Beogradi, e Kurti të shpërblehet“, thotë Petkoviq.

Petkoviq thekson se në seancën e Këshillit të Sigurisë u përcaktua se vijat e kuqe janë respektimi i Kushtetutës së Republikës së Serbisë.

"Ne kurrë nuk do të heqim dorë nga kjo, Kosova është pjesë integrale e Serbisë dhe do të mbetet e tillë, prandaj Kurti nuk është i kënaqur me qeverinë aktuale në Beograd, prandaj ai mbështet bllokuesit, mbështet protestat në Beograd, duke shpresuar se dikush do të vijë në krye të Serbisë që do t'i plotësojë dëshirat Kurtit. Vijat tona të kuqe janë të qarta. Ne nuk do të heqim dorë nga populli serb në Kosovë e Metohi, do të luftojmë për ta, do të gjejmë mënyra dhe do të intensifikojmë aktivitetet diplomatike në mënyrë që të gjithë në botë të dinë se çfarë po ndodh në KeM, se të gjithë kanë një ide se të drejtat e njeriut po shkelen në zemër të Evropës, dhe Perëndimi hesht”, përfundoi Petkoviq.