Petkoviq: Kurti do të donte të shfuqizonte Listën Serbe dhe popullin serb në Kosovë, por nuk do të ketë sukses

Drejtori i Zyrës për Kosovë dhe Metohi, Petar Petkoviq, ka thënë se duke i penguar deputetët e Listës Serbe të marrin pjesë në seancën e Kuvendit të Kosovës, Albin Kurti ka treguar pa mëdyshje se Lista Serbe i është “gjemb në këmbë”, sepse mbron interesat e popullit serb në Kosovë.

Petkoviq në një deklaratë ka thënë se Beogradi dhe deputetët e Listës Serbe disa herë kanë treguar qartë se Kurti dëshiron të vendosë serbë të ngjashëm me të në vendet parlamentare të rezervuara për deputetët serbë dhe jo ata që janë luftëtarë të vërtetë për të drejtat e popullit serb.

“Edhe një herë presidenti Aleksandar Vuçiq tregoi se kishte të drejtë kur tha se plani i Kurtit ishte eliminimi i Listës Serbe me të gjitha mjetet dhe se për këtë është lansuar makina propagandistike e Prishtinës në lidhje me kanalin Ibër-Lepenci. Kur kjo nuk funksionoi për Kurtin, ai vendosi t'i ndalojë fizikisht anëtarëve të Listës Serbe që të mbrojnë mandatet e tyre në seancë”, ka theksuar Petkoviq.

Ai përkujtoi se deputetët e Listës Serbe janë zgjedhur me votën e popullit serb, i cili i ka dhënë mandate dhe legjitimitet, prandaj Kurti nuk mund t'ua heqë mandatet e as t'i ndalojë.

“Është e qartë se Kurti do ta shfuqizonte Listën Serbe dhe popullin serb në Kosovë e Metohi, në mënyrë që të përfundonte politikën e tij për Shqipërinë e madhe dhe një krahinë ku nuk ka serb e serb, por ai nuk do të jetë në gjendje ta bëjë këtë”, tha Petkoviq.

Ai shtoi se kjo është “një pamje dhe shembull i “demokracisë” dhe “sundimit të ligjit” të Kurtit, të cilin ai e zbaton me dhunë, grushte, armë, terror dhe represion, të cilat ia tregoi sot mbarë botës.