Petkoviq: Kurti nuk i dëshiron serbët, as paqen, as dialogun, pushtimi shtesë i veriut të Kosovës është duke u zhvilluar

Drejtori i Zyrës për Kosovë dhe Metohi, Petar Petkoviq, tha se Albin Kurti nuk dëshiron serbët në Kosovë, as paqen, as dialogun, dhe se situata e krijuar pas dëmtimit të kanalit Ibër-Lepenci është vetëm në dobi të tij, për të vazhduar me sulmet ndaj serbëve, politikën antiserbe dhe persekutimin e popullit serb.

Petkoviq tha për RTS-në se qytetarët në veri nuk duhet të shqetësohen, sepse ka rrymë dhe ujë dhe u bëri thirrje që të mos bien në provokime, të qëndrojnë të qetë dhe t'i besojnë Serbisë dhe presidentit Aleksandar Vuçiq.

Petkoviq ka kujtuar se dje Serbia ka ofruar ndihmë logjistike, financiare dhe çfarëdo tjetër, sepse një incident që do të çonte në një fatkeqësi humanitare është në kundërshtim me interesat e Serbisë dhe serbëve në Kosovë, pasi që u dëmtua edhe kanali që u sjell ujë serbëve në veri.

Ai tha se është duke u bërë një pushtim shtesë i veriut të Kosovës nga regjimi i Prishtinës, i cili është i vetmi që i përshtatet kësaj situate.

“Nuk kalon ditë që të mos vendosin një gur themeli apo të mos punojnë për ndërtimin e stacioneve të reja policore. Kanë katër nënstacione të reja në Lepsaviq, një në Zubin Potok. Në Zveçan e shfrytëzojnë objektin e Komunës për nënstacion, në Mitrovicë e shfrytëzojnë hapësirën e ish Remontit Ushtarak... Katër baza ilegale në Zubin Potok dhe Leposaviq, po ndërtojnë bazën afër urës së Bistricës. Nuk ka asnjë pikë pa policinë e Kosovës të vendosur ilegalisht, që sipas marrëveshjes së Brukselit nuk ka çfarë të kërkojë në veri, sidomos jo me armë tytëgjata”, tha Petkoviq.

Ai shtoi se dje Prishtina po grumbullonte forca policore, duke sjellë më shumë se 10 autobusë policorë me pajisje të plota ushtarake në Mitrovicën e Jugut, nga ku kaluan në veri dhe bastisnin e kontrollonin shtëpitë.

“Po, asnjëherë nuk ka pasur më shumë dhe kjo tregon se kjo nuk është në interes të Beogradit, sepse ajo që ndodhi i dha Kurtit alibi për të vazhduar me sulme të reja në veri të Kosovës dhe Metohisë, me politikë antiserbe dhe persekutim të serbëve nga KeM, sepse ai ka më shumë nevojë për të tani. Ishte vetëm çështje kohe se kur do të niste me lëvizje dhe propaganda të reja të njëanshme, sepse po i bien rejtingu. Meqë nuk mund të ofrojë as punë, fabrika, rritje rrogash, para zgjedhjeve ofron sulme ndaj serbëve dhe pushtimit të veriut”, tha Petkoviq.

Ai ka theksuar edhe një herë se është i nevojshëm një hetim objektiv dhe për këtë ka apeluar dje në Kfor dhe EULEX.

Ai përkujtoi se Serbia ka investuar shumë në ujësjellësin rajonal në Kosovë, si dhe se ka luftuar për një marrëveshje energjetike, pikërisht që serbët të kenë furnizim stabil me ujë dhe energji elektrike.

"E gjithë kjo është e kundërta e asaj. Dhe ne nuk kemi zgjedhje, Prishtina ka. Tani duhet të vendoset për hapjen e një grupi për Serbinë. Kjo është arsyeja pse kjo nuk na shkon. Por,ka nga ata që kërkojnë heqjen e sanksioneve ndaj Kosovës, të cilët janë më të kënaqur me këtë situatë”, ka theksuar Petkoviq.

Ai ka thënë se Kurti ka nevojë për incidente dhe sulme në veri, sepse kjo është mënyra e vetme për të shmangur të gjitha obligimet, e mbi të gjitha Bashkësinë e Komunave Serbe.

Për të arrestuarin Dushan Millanoviq, ai tha se është një njeri i nderuar dhe i virtytshëm, të cilin Prishtina po e akuzon për diçka që nuk ka të bëjë me punën e tij mediatike, gjë që, theksoi, tregon raportet e tij me mediat serbe.

“Arrestimet vazhdojnë, duke i frikësuar kështu serbët. Ata thanë se janë arrestuar gjashtë persona, sipas informacioneve tona, dy janë në paraburgim, çka tregon se edhe ata nuk dinë më çfarë të bëjnë...Por ideja është që të vuajnë sa më shumë serbët, për t'i vënë ata nën sundimin e terrorit të Albin Kurtit me sulme”, ka treguar Petkoviq.

Ai shtoi se populli serb në veri është paqësor, i ndershëm dhe i virtytshëm dhe ata vetëm duan të jetojnë normalisht.

I pyetur se sa i kënaqur ka qenë me reagimin e parë të BE-së dhe KFOR-it, por edhe nëse është e mundur vazhdimi i dialogut në këtë situatë, Petkoviq ka thënë se Prishtina padyshim nuk dëshiron të flasë.

“Prishtina padyshim që nuk dëshiron të flasë. Ai dëshiron të shkojë në një rrugë tjetër, të kundërtën e dialogut. Për ne, populli serb është në radhë të parë, por për të garantuar paqen dhe sigurinë, është e nevojshme të përmbushet gjithçka për të cilën është rënë dakord në dialog. Kjo është arsyeja pse ne insistojmë në dialog. Dialogu nuk ka alternativë për të shpëtuar serbë. Kurti nuk e do këtë, nuk e do Serbinë, nuk do paqe dhe dialog. Kjo është arsyeja pse ai përdor lëvizje të njëanshme”, shpjegoi ai.

Ai theksoi se në momentin kur BE-ja doli me njoftimin me të cilin kërkoi përsëritjen e zgjedhjeve në veri, themelimin e BKS-së, ka pasur 90 lëvizje përshkallëzuese.

“Ata nuk duan asgjë. Nga ana tjetër keni njoftime të ndryshme nga BE, Quinti dhe të tjerë që dënojnë verbalisht sulmet, ku tani po dënojnë atë që ndodhi në Varaga, por nuk ka asnjë veprim konkret në drejtim të deeskalimit”, nënvizoi ai.

Petkoviq tha se ai vazhdon t'i thotë BE-së dhe të dërguarit të saj se është e mundur të flitet për gjithçka që është në agjendë, për çështjet thelbësore të dialogut, por si mund të flasim për ndonjë gjë nëse në terren keni mbyllje të komunave serbe, banka, nëse keni arrestime të serbëve, tentime për mbylljen e shkollave serbe, pa ndalur një lloj tensioni.

Ai i bëri thirrje popullit serb që të mos bie në provokime, të qëndrojë i qetë dhe t'i besojë vendit të tij dhe presidentit të Serbisë, Aleksandar Vuçiq, i cili, siç tha ai, sot do të ngrejë shumë çështje dhe do të tregojë synimet shumë të rrezikshme të Kurtit dhe regjimit në Prishtinë.