Simiq: Shpërthimin në Zubin Potok Kurti po e përdor si alibi për përballje kundër serbëve në Kosovë

Autoritetet në Prishtinë po e përdorin shpërthimin në kanalin Ibër-Lepenci si alibi për përballje kundër serbëve të Kosovës, ka paralajmëruar zyrtari i Listës Serbe, Igor Simiq, i cili raporton se veriu i Kosovës sot në mëngjes duket si një territor i pushtuar, sepse në rrugë janë qindra forca speciale shqiptare të armatosur deri në dhëmbë, duke demonstruar forcë dhe fuqi dhe duke frikësuar serbët.

"Në rrugët tona ka qindra forca speciale njëkombëshe të armatosur deri në dhëmbë, të cilët u dërguan në veri, kryesisht në Mitrovicë të Kosovës dhe Zubin Potok për të demonstruar forcë dhe fuqi," tha Simiq për RTS.

Ai shtoi se nuk ka informacione se ka arrestime të reja.

“Sipas informacioneve që kam, nga të gjitha ato arrestime, dy persona janë ende në paraburgim. Në mesin e tyre është edhe punonjësi i medias Dushan Millanoviq, një familjar i cili ka kohë që është në media dhe që ka një rezyme të patëmetë, nuk mendoj se ka as gjobë trafiku”, shpjegoi Simiq.

Ai tha se ende nuk ka informacione se pse po akuzohet.

“Ajo për të cilën prokuroria e akuzon është krimi i terrorizmit. E pabesueshme se sa shpesh prokurorët nën kontrollin e Prishtinës nuk e vërtetojnë një krim të tillë ndaj serbëve me prova serioze”, shtoi Simiq.

Ai theksoi se në të gjitha udhëkryqet ka njerëz të armatosur rëndë që nuk e flasin gjuhën serbe dhe se mund të imagjinohet se si duket në sytë e fëmijëve serbë.

Ai tha gjithashtu se arrestimet e djeshme i ngjanin një bastisjeje brutal nga banditët dhe lanë familje të traumatizuara.

“Ajo që i trembi më së shumti serbët ishin deklaratat e djeshme të disa politikanëve të Prishtinës se çështja e shpërthimit duhet të zgjidhet me një veprim si Stuhia, dhe ne e dimë se çfarë solli Stuhia – dëbimin e serbëve”, shtoi Simiq.

Ai tha se Kurti dëshiron të marrë mbështetjen ndërkombëtare dhe ta përdorë atë kundër serbëve.

“Pas vetëm disa orësh pasi ka ndodhur kjo ngjarje, ai ka dalë në vendngjarje, ka marrë me vete kamera të shumta dhe ka refuzuar të përgjigjet për mediat serbe, dhe e përdori këtë për të akuzuar Serbinë dhe Aleksandar Vuçiqin, duke krijuar një atmosferë në të cilën lejohet gjithçka kundër serbëve”, shtoi Simiq.

Ai tha se nuk dihet se sa do të zgjasin problemet me kufizimet e furnizimit me ujë, por theksoi se Graçanica, e banuar kryesisht me serb, pas shpërthimit ka mbetur pa ujë, si mesazh për serbët se nuk ka ujë për ta.

Simiq tha se Prishtina përsëri po përpiqet të identifikojë Kosovën dhe Serbinë me Rusinë dhe Ukrainën.

Ai ka theksuar se përfaqësuesit e Listës Serbe kanë vizituar të gjitha familjet e prekura nga inkursioni i Policisë së Kosovës dhe se të gjithë të ndaluarve iu është ofruar ndihmë juridike.

“Atyre që u arrestuan iu ofrua ndihmë juridike dhe unë dhe kolegët e mi nga Lista Serbe dje ishim në rrugët e Mitrovicës së Kosovës bashkë me familjet tona, dhe këtë do ta bëjmë edhe sot, për të dërguar mesazhin se nuk na trembën. Ky është qyteti ynë dhe ne kemi të drejtë të jetojmë në të. Në këtë mënyrë ne do t'i përgjigjemi në mënyrë demokratike represionit të bërë nga Albin Kurti me aparatin e tij parapolicor”, tha Simiq.