Petkoviq: Ndërsa Kurti nga Prizreni ëndërron ëndrrat e mëdha shqiptare, Serbët e kujtojnë përvjetorin e miratimit të rezolutës 1244

Drejtori i Zyrës për Kosovë dhe Metohi, Petar Petkoviq, lidhur me deklaratën e kryeministrit të Kosovës Albin Kurti se do ta ruajë filozofinë e Lidhjes së Prizrenit, theksoi se nuk ka asnjë serb të cilit Kurti nuk do t'i kujtojë se Prizreni, shumë kohë përpara se një grup besnikësh osmanë të mblidheshin atje në këtë ditë 145 vjet më parë për të themeluar Lidhjen e Prizrenit, ishte kryeqyteti i perandorëve serbë.

Petkoviq në deklaratë ka thënë se kur Kurti shpall se do të ndjekë “filozofinë e Lidhjes së Prizrenit”, do të thotë se do të ndjekë ideologjinë e cila ndër të tjera, përfundimisht çoi në faktin se sot në qytetin perandorak serb pothuajse nuk flitet serbisht.

“Duke iu referuar ‘filozofisë së Lidhjes së Prizrenit’, Kurti i referohet edhe karakterit të saj antiserb dhe antisllav dhe përpiqet të sigurojë një alibi historike për politikën e tij agresive shoviniste të sotme. Edhe pse goja e tij është plot me demokraci dhe shoqëria civile, është e pamundur që ai të njohë ndonjë karakter joshqiptar të Kosovës dhe Metohisë, sepse për të demokracia është e rezervuar vetëm për shqiptarët, e shoqëria civile vetëm kur në atë shoqëri jetojnë vetëm shqiptarët”, theksoi Petkoviq.

Ai shtoi se, ndërsa Kurti “ëndërron ëndrrat e mëdha shqiptare nga Prizreni në një ekstazë nacional-romantike, sot serbët kujtojnë përvjetorin e një dokumenti më të fundit dhe, thotë ai, shumë më relevant për politikën bashkëkohore, që është Rezoluta 1244 e Këshillit të Sigurimit të OKB-së.

“Rezoluta 1244, e cila u miratua edhe sot, është një dokument juridik ndërkombëtar i detyrueshëm për Kosovën dhe Metohinë, dhe nëse ai tashmë është dashamirës i përvjetorëve dhe historisë, Kurti nuk duhet të kthehet në të kaluarën e lashtë, përkundrazi, duhet të kërkojë frymëzim dhe bazë për veprim politik në atë dokument të Këshillit të Sigurimit të OKB-së”, ka përfunduar Petkoviq.