Pritja solemne e Ambasadës së SHBA-së në Beograd; Vuçiq: Aleanca historike është themel për marrëdhënie edhe më të mira

Ambasada e Shteteve të Bashkuara të Amerikës në Beograd shënoi sot, me një pritje solemne, 250-vjetorin e pavarësisë së Shteteve të Bashkuara. Në këtë pritje mori pjesë edhe presidenti i Serbisë, Aleksandar Vuçiq, i cili tha se aleanca historike mund të shërbejë si bazë e mirë për ndërtimin e marrëdhënieve edhe më të mira ndërmjet dy vendeve.

Të ftuarit u pritën nga i ngarkuari me punë i Ambasadës së SHBA-së, Alexander Titolo, ushtruesja e detyrës së zëvendësshefes së misionit, Erin Kotheimer, si dhe koloneli Joshua Kasser me bashkëshorten e tij, njofton RTV.

Në fillim të ceremonisë, Titolo tha se ky vit është historik jo vetëm për Shtetet e Bashkuara, por edhe për marrëdhëniet amerikano-serbe.

Ai theksoi se në epokën e re të marrëdhënieve amerikano-serbe veçanërisht do të veçonte njerëzit që po e ndërtojnë këtë epokë dhe që tregojnë se çfarë është e mundur kur njerëzit punojnë së bashku për t’i shndërruar idetë në rezultate.

“Jam i bindur se vitet më të mira të marrëdhënieve amerikano-serbe janë ende përpara nesh. Ju falënderoj për partneritetin, miqësinë dhe mbështetjen, jo vetëm sot, por edhe për të ardhmen që po e ndërtojmë së bashku”, tha Titolo.

Me rastin e Ditës së Pavarësisë së SHBA-së, presidenti i Serbisë, Aleksandar Vuçiq, uroi popullin amerikan dhe presidentin Donald Trump, duke u dëshiruar paqe, sukses dhe mirëqenie.

“Besoj se aleanca jonë historike mund të jetë një bazë e mirë për ndërtimin e marrëdhënieve edhe më të mira në të ardhmen. Serbia mbetet e përkushtuar ndaj paqes, dialogut dhe bashkëpunimit me partnerët në mbarë botën, e bindur se biseda e hapur dhe respekti i ndërsjellë sjellin rezultatet më të mira për qytetarët tanë”, shkroi Vuçiq në Instagram.

Në pritje morën pjesë edhe Patriarku i Kishës Ortodokse Serbe, Porfirije, ministri i Punëve të Jashtme, Marko Gjuriq, ministri i Punëve të Brendshme, Ivica Daçiq, ministrja e Minierave dhe Energjisë, Dubravka Gjedoviq Handanoviq, ministrja e Ekonomisë, Adrijana Mesaroviq, ministrja e Ndërtimtarisë, Aleksandra Sofronijeviq, si dhe ministri i Arsimit, Dejan Vuk Stankoviq.

Në ceremoninë e organizuar në Qendrën Amerikane në Lozhionica ishin të pranishëm edhe kryetarja e Qeverisë Krahinore, Maja Gojkoviq, drejtori i përgjithshëm i Telekom Serbia, Vladimir Lluçiq, si dhe përfaqësues të bashkësive fetare dhe të trupit diplomatik.

Gjatë ceremonisë, Titolo i ndau Çmimin për Miqësi me Ambasadën e SHBA-së majorit të Ushtrisë së Serbisë, Marko Drizhiq, drejtoreshës së Lozhionicës, Ana Illiq, dhe drejtorit të Zyrës për IT dhe e-Qeverisje, Mihailo Jovanoviq, për të cilët tha se kanë ndërtuar diçka që do të zgjasë për breza.

“Ky çmim ndahet vetëm një herë në 250 vjet. Faleminderit Anës dhe Mihailit për gjithçka që kanë bërë për ndërtimin e këtij kompleksi dhe të këtij partneriteti”, tha Titolo.

Ceremonia filloi me marshimin e marinsave amerikanë, nderimin e flamurit, interpretimin e himneve të Serbisë dhe të Shteteve të Bashkuara të Amerikës, ndërsa u shfaq edhe një film i shkurtër kushtuar pavarësisë së SHBA-së.