Rakiq: E njohëm Presidentin Vuçiq me situatën e vështirë në të cilën ndodhen serbët nga Kosova dhe Metohia

Përfaqësuesit e serbëve nga Kosova janë takuar sot me presidentin e Serbisë, Aleksandar Vuçiq, dhe siç ka thënë kreu i Listës Serbe, Goran Rakiq, me atë rast, ata e njohën Vuçiqin me situatën e vështirë në të cilën ndodhen serbët në jug dhe në veri të Ibrit.

“Kur them një situatë të vështirë, kam parasysh edhe njerëzit tanë në jug të Ibrit, dhe situata është veçanërisht e vështirë që nga pushtimi i ROSU-së në veri. E informuam presidentin për situatën në secilën komunë dhe i sollëm video që tregojnë qartë se dy bashkëqytetarët tanë të arrestuar në asnjë mënyrë nuk kanë marrë pjesë në trazira dhe as nuk kanë kërcënuar askënd. Ata bënë rezistencë pasive dhe faji i vetëm i tyre është se janë serbë”, tha Rakiq.

Kreu i Listës Serbe thekson se kanë kërkuar nga presidenti i Serbisë dhe drejtori i Zyrës për Kosovë e Metohi që të shfrytëzojnë autoritetin e tyre me përfaqësuesit ndërkombëtarë që qytetqrët e arrestuar të lirohen sa më shpejt.

“Gjithashtu, ne i kërkuam presidentit që të ndalojë persekutimin e popullit serb nga forcat speciale të dërguara nga autoritetet në Prishtinë dhe përsëritëm kërkesat tona që i kemi paraqitur Lajçakut dhe Eskobarit që BKS të formohet sa më shpejt dhe statuti të miratohet nga Prishtina, Beogradi dhe BE-ja sa më shpejt të jetë e mundur”.

Milloviq: E kemi informuar presidentin se do të vazhdojmë me protestat paqësore

Ish-kryetari i komunës së Zveçanit, Dragisha Milloviq, tha se sot është dita e 17-të që qytetarët tanë këmbëngulin në luftën legjitime për të drejtat e tyre njerëzore.

“Ata nuk mund të shkojnë në punë, fëmijët nuk mund të shkojnë në shkollë. Ne jemi për deeskalimin, duhet bërë vetëm ajo që është rënë dakord. Që qytetarët tanë të kthehen dhe të ofrojnë shërbimet e tyre. Në Zveçan nuk ka asnjë punëtor yni. Është e rëndësishme të lirohen bashkëqytetarët tanë, Obrenoviq dhe Petroviq, për të ndalur terrorin dhe frikësimin”, thotë Milloviq dhe shton.

“E kemi informuar presidentin se po vazhdojmë protestat tona paqësore civile, demokratike. Sot është dita e 17-të, në shi a në diell, qytetarët tanë ngulmojnë 24 orë në ditë në luftën e tyre legjitime, ligjore për të drejtat e tyre themelore të njeriut. Qytetarët, gjegjësisht punëtorët e vetëqeverisjes sonë lokale, për ditën e 17-të nuk mund të shkojnë në vendet e tyre të punës, fëmijët tanë, shkollat ​​e tyre janë ende të rrethuar me tela me gjemba”, tha Milloviq.