Sadiku: Vetëvendosje e shkel tri herë Kushtetutën që zgjedhjet të mbahen më 27 dhjetor

Deputeti i Lidhjes Demokratike të Kosovës, Ermal Sadiku, pret që Vetëvendosje t’i çojë qytetarët e Kosovës sërish në zgjedhje, edhe atë më 27 dhjetor.

Ai, lidhur me vendimin e Vetëvendosjes që në seancën e sotme konstituive të votojë për kandidatët e PDK-së dhe LDK-së për nënkryetarë të parlamentit, tha se e gjithë bllokada ka për qëllim mbajtjen e zgjedhjeve në dhjetor.

„Tani Lëvizja Vetëvendosje ka vendosur të votojë për nënkryetarët e partive të tjera. Siç kam thënë para dy muajsh, ata do të na çojnë sërish në zgjedhje gjatë dimrit. Datën që e kanë përmendur, 27 dhjetorin, e kanë përcaktuar me këtë vendim, 60 ditë plus 45 ditë na çojnë pikërisht deri më 27 dhjetor. Pra, e gjithë kjo bllokadë, lojërat me Kuvendin dhe zvarritja, vetëm që të arrijnë te data që e kanë planifikuar“, shkroi Sadiku në Facebook.

Ai shtoi se Vetëvendosje është parti që e shkel Kushtetutën tri herë vetëm për të arritur te data që i përshtatet për zgjedhje.

„Parti që nuk dëshiron stabilitet. Dëshiron kaos. Politikisht do të merrni fund. Populli nuk do t’jua harrojë këto lojëra me shtetin“, porositi Sadiku.