SHBA bëjnë thirrje për zbatimin e Marrëveshjes së Ohrit

Marrëveshja për rrugën drejt normalizimit të marrëdhënieve ndërmjet Kosovës dhe Serbisë, e arritur në shkurt të vitit 2023 me ndërmjetësimin e Bashkimit Evropian, përfaqëson një hap pozitiv drejt normalizimit të marrëdhënieve mes dy palëve, të cilat “duhet të synojnë përparim të shpejtë në zbatimin e Aneksit të kësaj marrëveshjeje”, thuhet në Ligjin për Autorizimet e Mbrojtjes Kombëtare, të miratuar nga të dy dhomat e Kongresit amerikan dhe të nënshkruar më 18 dhjetor nga presidenti i Shteteve të Bashkuara të Amerikës, Donald Trump.

Siç raporton Radio Evropa e Lirë, në dokument theksohet se, pas arritjes së një përparimi të mjaftueshëm, SHBA duhet të shqyrtojë iniciativa për forcimin e marrëdhënieve dypalëshe me të dy vendet, përfshirë dialogun strategjik dypalësh dhe iniciativa konkrete për thellimin e lidhjeve ekonomike dhe investimeve.

Sipas këtij akti, SHBA duhet të vazhdojë të mbështesë një marrëveshje gjithëpërfshirëse dhe përfundimtare ndërmjet Kosovës dhe Serbisë, të bazuar në njohjen reciproke, pa mbështetur shkëmbime territoriale, ndarje apo ndryshime të tjera kufijsh mbi baza etnike në Ballkanin Perëndimor, si dhe të mbështesë demokracitë pluraliste në rajon për të parandaluar rikthimin e konflikteve etnike.
Ligji për mbrojtjen kombëtare për vitin fiskal 2026 autorizon shpenzime vjetore rekord për ushtrinë amerikane në vlerë prej 901 miliardë dollarësh, që është tetë miliardë më shumë sesa kishte kërkuar administrata Trump.

Dokumenti përfshin një sërë çështjesh – nga blerja e anijeve, avionëve dhe sistemeve raketore, deri te rritja e pagave për ushtarët dhe mënyrat e përballjes me kërcënimet gjeopolitike.

Në tekst i kushtohet vëmendje e veçantë varësisë së vendeve të Ballkanit Perëndimor nga energjia ruse, me vlerësimin se kjo varësi i lidh ekonomitë dhe politikat e tyre me Moskën dhe pengon integrimet evropiane. Njëkohësisht theksohet se korrupsioni, përfshirë edhe në nivelet më të larta politike, mbetet një nga pengesat më të mëdha për zhvillimin e mëtejshëm ekonomik dhe politik të rajonit.
Në akt nënvizohet se ulja e varësisë së Ballkanit Perëndimor nga gazi rus dhe lëndët djegëse fosile është në interesin kombëtar të SHBA-së, si dhe se Uashingtoni duhet të mbështesë anëtarësimin e vendeve të rajonit në Bashkimin Evropian dhe në NATO.

Po ashtu paralajmërohet se rritja e ndikimit kinez në Ballkanin Perëndimor mund të ketë pasoja negative për konkurrencën strategjike, demokracinë dhe integrimin ekonomik me Evropën. Për këtë arsye, nga institucionet amerikane kërkohet raportim i rregullt ndaj Kongresit për ndikimin malign të Rusisë dhe Kinës në rajon.