Simiq: Arrestimi i serbëve në bazë të disa listave sekrete të Prishtinës është një turp në fytyrën e komunitetit ndërkombëtar

Nënkryetari i Listës Serbe, Igor Simiq, ka bërë të ditur se Prokuroria nuk ka paraqitur asnjë provë në procedurën kundër Dejan Pantiqit, se policia e Kosovës po e mban në një vend të panjohur si rrëmbyes dhe se gjykata e Kosovës ka urdhëruar një paraburgim njëmujor në bazë të parimit “ju padit gjyqtari,ju gjykon gjyqtari".

Në një prononcim në Facebook, Simiq theksoi se kjo duket joreale në shekullin e 21-të në tokën evropiane, por që është e përditshme në Kosovë, si dhe faktin se Pantiq nuk ka pasur kontakte me familjen dhe avokatin e tij që nga momenti kur ka qenë i rrëmbyer nga policia e Kosovës, as nuk ka mundur t'i informojë se ku ndodhej dhe në çfarë gjendjeje shëndetësore, duke pasur parasysh se është një pacient i rëndë me zemër.

"Në rrethana të tilla, është më se e qartë se nuk bëhet fjalë për një proces ligjor, por për dhunë klasike institucionale me qëllim të persekutimit të pamaskuar të popullit serb në këto hapësira. Familjet Axhiqi dhe Pantiqi prej ditësh po kalojnë në agoni sepse anëtarët e tyre janë fajtorë sepse janë serbë dhe për shkak se përfaqësuesit ndërkombëtarë nuk i interesojnë vuajtjet e popullit tonë", tha Simiq.

Simiq ka përsëritur se arrestimi i serbëve në bazë të “disa listave sekrete të Prishtinës është një turp për fytyrën e komunitetit ndërkombëtar”, i cili nuk e dënoi një presion të tillë ndaj serbëve me një gjest apo deklaratë të vetme.

"Të nderuar zotërinj, Dejan Pantiq është i pafajshëm, ashtu si Milan Axhiq dhe të gjithë të tjerët që janë futur në listën e arrestimeve nga Prishtina dhe  kërkojmë që sa më shpejt ta ndaloni këtë lloj persekutimi, i cili destabilizon situatën në terren", tha Simiq.