Simiq: Ne jemi të përkushtuar për paqen, por këtu vlon, njerëzit nuk mund të jetojnë kështu në shekullin e 21-të

Nënkryetari i Listës Serbe, Igor Simiq, ka thënë se situata në Kosovë aktualisht është e qetë, por e tensionuar, raporton RTS.

Simiq shtoi se sonte ishte një natë tjetër pa gjumë për serbët në Kosovë për shkak të lëvizjeve të njëanshme të Prishtinës, e cila mbrëmë “u përpoq të pushtojë veriun e Kosovës e Metohisë duke dërguar më shumë se 250, 300 pjesëtarë shqiptarë të forcave speciale nga pjesa jugore".

"Një natë ku prindërit duhet të mendonin nëse mund t'i dërgojnë fëmijët e tyre në shkollë, nëse mund të shkojnë në punë, nëse mund të shkojnë në dyqan për të blerë gjërat e tyre të nevojshme. Këto janë gjëra themelore dhe gjëra që merren si të mirëqena kudo që jeta është normale. Këtu shtrohet pyetja se çfarë duhet bërë dhe si të vazhdohet. Nëse keni parasysh se në më pak se 16 orë Albin Kurti dhe forcat e tij speciale shkaktuan krizë në Hoçën e Madhe duke vjedhur pasurinë e serbëve dhe familjes Petroviq, depërtimi i forcave speciale ROSU në kopshtin derisa fëmijët serbë po flenë në komunën e Leposaviqit dhe përpjekja e mbrëmshme për të zbarkuar dhe pushtuar pjesën veriore të Mitrovicës - kjo e përshkruan më së miri situatën dhe se si ndihen qytetarët në veri të Kosovës e Metohisë dhe jo vetëm serbët, por edhe shqiptarët, boshnjakët, romët, goranët dhe të gjithë të tjerët që u kapën mbrëmë me lëvizje të tilla që destabilizojnë edhe më shumë situatën nga ana e Prishtinës”, thotë Simiq.

Ai shtoi se të gjithë në mesin e serbëve në Kosovë po përpiqen t'u ofrojnë fëmijëve të tyre një jetë normale.

“Por si? Vetëm imagjinoni situatën kur forcat speciale, të armatosura deri në dhëmbë, që kanë shkaktuar qindra incidente dhe kanë rrahur serbët, vijnë pak metra larg kokave të fëmijëve që flenë të qetë në kopshtin e fëmijëve, apo kur papritmas shfaqen njerëz të armatosur të panjohur rreth apartamenteve dhe shtëpive tuaja në mes të natës duke demonstruar forcë dhe duke u përpjekur të  trembin njerëzit e thjeshtë me duar të zveshura, të cilët thjesht duan të jetojnë një jetë të denjë për një njeri në vatrat e tyre”, shton Simiq.

“Plani është i qartë – të krijohen kushte të tilla që serbët të heqin dorë dhe të tërhiqen”

I pyetur se ku ndodhen forcat speciale për momentin, Simiq thotë se në periferi të qytetit në vendbanimet e përziera multietnike ka ende disa njësi që kanë ardhur nga jugu ilegalisht, pa asnjë arsye në veri të Kosovës dhe mbi të gjitha në Mitrovicën e Veriut.

"Ajo që dua të theksoj në veçanti është se arsyetimi që ata përdorën, se duhej të vinin, nuk është absolutisht i vërtetë. Këtu nuk ka pasur destabilizime të rrethanave - serbët dhe boshnjakët, shqiptarët dhe goranët kanë pasur një ditë absolutisht normale këtu dje," thekson Simiq.

Ai kujtoi se në vitet e fundit kemi pasur tridhjetë sulme ndaj serbëve.

“Kur ne insistuam në rritjen e prezencës së policisë në jug të Ibrit, ku serbët janë më të cenueshëm, ku ata vuajnë presionin më të madh, askush nga Prishtina nuk mendoi të dërgonte një patrullë shtesë, e lëre më qindra forca speciale të armatosura deri në dhëmb.  Kjo është hipokrizia që tregojnë Albin Kurti dhe poltronat e tij, sepse plani është i qartë - të krijohen kushte të tilla, të ushtrohet një presion i tillë mbi serbët, mbi fëmijët serbë, mbi fermerët serbë që po luftojnë për të siguruar pak bukë për fëmijët e tyre në Hoçë të Madhe, që serbët të dorëzohen, që serbët të tërhiqen nga këto vise”, thekson Simiq.

"Njerëzit nuk mund të jetojnë kështu në shekullin 21"

Duke folur për mënyrën se si do të sillen serbët në ditët në vijim, Simiq thotë se asnjë incident në muajt e fundit në Kosovë nuk është shkaktuar nga qytetarët serbë të cilët me qetësi dhe dinjitet përpiqen të ruajnë paqen për veten dhe familjet e tyre në kushte të pamundura.

“Përpjekja për t'u dhënë hapësirë ​​negociatorëve përmes dialogut, dhe kryesia e Listës Serbe posaçërisht insiston në këtë, që me dialog të zgjidhen çështjet e hapura ndërmjet Beogradit dhe Prishtinës, ndërmjet serbëve dhe shqiptarëve”, tha Simiq.

Ai ka theksuar se, për fat të keq, nuk mund të parashikojmë lëvizjet e Prishtinës.

"Pra, veprimet tona, veprimet e qytetarëve tanë do të varen absolutisht nga situata në terren. Ajo që mund të konfirmoj është se ne jemi të përkushtuar ndaj paqes dhe do të bëjmë gjithçka për të ruajtur paqen, por më besoni, këtu vlon, njerëzit nuk mund të jetonë kështu në shekullin e 21-të në tokën e Evropës, ndërsa Prishtina shkel të drejtat themelore të njeriut, të gjitha marrëveshjet e nënshkruara, keqtrajton popullin serb dhe komuniteti ndërkombëtar hesht”, përfundoi Simiq.