Sinirlioglu: OSBE mbetet fuqimisht e përkushtuar në mbështetjen e prioriteteve reformuese të Serbisë

Sekretari i Përgjithshëm i Organizatës për Siguri dhe Bashkëpunim në Evropë (OSBE), Feridun Sinirlioglu, i cili dje qëndroi në Beograd, konfirmoi gjatë takimeve me zyrtarët serbë angazhimin e vazhdueshëm të kësaj organizate për stabilitetin rajonal dhe mbështetjen e Serbisë në zbatimin e reformave.

Sinirlioglu u takua në Beograd me presidentin e Serbisë, Aleksandar Vuçiq, kryeministrin Gjuro Macut dhe ministrin e Punëve të Jashtme, Marko Gjuriq.

Siç thuhet në njoftimin e OSBE-së, ku përmblidhet vizita e djeshme e Sinirlioglut në Beograd, bisedimet u përqendruan në partneritetin afatgjatë të OSBE-së me Serbinë, prioritetet e vendit në zbatimin e reformave dhe bashkëpunimin rajonal.

Sekretari i Përgjithshëm rikonfirmoi përkushtimin për stabilitetin rajonal, si dhe mbështetjen për Serbinë, përfshirë edhe punën e Misionit të OSBE-së në Serbi.

“Aktivitetet e Misionit janë në përputhje me prioritetet e përcaktuara nga Qeveria e Serbisë dhe zbatohen në partneritet me autoritetet serbe, institucionet e pavarura, mediat, përfaqësuesit e pakicave kombëtare, komunitetin akademik, shoqatat profesionale dhe organizatat e shoqërisë civile”, thuhet në njoftim.

Sinirlioglu theksoi se e vlerëson shumë bashkëpunimin me Serbinë dhe institucionet e saj.

“Rikonfirmoj angazhimin tonë të fuqishëm për të mbështetur prioritetet reformuese të Serbisë dhe për të punuar së bashku për avancimin e sigurisë, qeverisjes demokratike, sundimit të ligjit dhe respektimit të të drejtave të njeriut në dobi të të gjithë qytetarëve. Misioni ynë në Serbi bashkëpunon ngushtë me misionet në terren në të gjithë Evropën Juglindore, duke forcuar bashkëpunimin në të tri dimensionet e sigurisë – atë politiko-ushtarake, ekonomike dhe mjedisore, si dhe në fushën e të drejtave të njeriut. Kjo kontribuon në mirëqenien e të gjithë rajonit”, deklaroi Sinirlioglu.