Smajlloviq: Nuk ka konsensus për Kosovën sepse opozita shpreson se kjo çështje do ta largojë Vuçiqin nga pushteti

Në skenën politike serbe, nuk mund të arrihet një konsensus për Kosovën, sepse ka njerëz në opozitën pro-evropiane që do të dëshironin që presidenti serb Aleksandar Vuçiç ta njihte zyrtarisht Kosovën, ta largonte atë nga pushteti dhe më pas t'i binte në prehër votuesit e zhgënjyer, e pastaj kur të vijnë në pushtet nuk duhet të merren fare me atë temë, thotë për Kosovo online gazetarja Lilana Smajlloviq.

“Kjo shihet edhe nga fakti se ajo pjesë e opozitës nuk është më e gatshme as të përsërisë deklaratën “nuk do ta njohim kurrë Kosovën”. Dhe ne e dimë nga WikiLeaks-i se Ambasada Amerikane i tha qeverisë së atëhershme të Tadiqit 15 vjet më parë - ju nuk i vini pengesa negociatave dhe lirisht thoni se nuk do ta njihni kurrë Kosovën. Atëhere Amerika e njohu Kosovën. Tani kemi ardhur në pikën ku shumë njerëz në opozitën pro-evropiane as nuk do ta përsërisin atë frazë rituale”, thotë ajo.

Kur bëhet fjalë për opozitën kombëtare, të djathtë, vazhdon Smajlloviq, ata “gjoja bien dakord për një temë, që është se janë kundër marrëveshjes franko-gjermane”.

“Por ne kemi parë që edhe për këtë temë, për të cilën gjoja bien dakord, nuk janë në gjendje të bashkohen politikisht. Më duket se disi tregon se nuk është tema kryesore e tyre, siç na sigurojnë ata, se ky nuk është qëllimi i tyre i ekzistencës dhe se shpresa e tyre është që njerëzit që kanë frikë se Vuçiq do ta tradhtojë Kosovën, disi do të vrapojnë tek ata të dëshpëruar sepse nuk dinë ku të shkojnë. Dhe në fakt as Kosova nuk është çështja kryesore për ta”, thotë Smajlloviq, e cila beson se Kosova nuk do të jetë çështje kryesore në fushatën për zgjedhjet e jashtëzakonshme parlamentare të planifikuara për 17 dhjetor, e lëre më që prej saj të dalë ndonjë konsensus kombëtar.

E pyetur se sa e vështirëson qëndrimin e Beogradit në dialogun me Prishtinën mungesa e unitetit politik për çështjen e Kosovës, por edhe në raport me bashkësinë ndërkombëtare, Smajlloviq thotë se nga njëra anë nuk e vështirëson, sepse “ndërmjetësuesit, pra Perëndimi, e dinë se Aleksandar Vuçiq ka kontroll mbi skenën politike në Serbi”.

“Ata e dinë se kur negociojnë me të, po negociojnë me Serbinë dhe se nuk do të shfaqet asnjë forcë politike që mund të kërcënojë faktin se ai përfaqëson Serbinë. Por në fakt nuk funksionon për ne që nuk ka konsensus kombëtar. Na prish përshtypjen që ka bota për ne, na dëmton sepse partitë opozitare nuk dalin kurrë për t'iu drejtuar aleatëve dhe miqve të tyre evropianë, për t'iu shkruar mediave perëndimore, për të kritikuar diplomatët perëndimorë që bëjnë sikur nuk e dinë fjalën Serbët kur është fjala për Kosovën”, thotë ajo.

Ajo jep një shembull kur ambasadori francez në Kosovë kohët e fundit gjatë një vizitë në Novobërdë tha se ishte një vend për të cilin të gjitha komunitetet lokale kontribuan dhe shmangu të thoshte se ishte një qytet mesjetar serb.

"Dhe se kontributi i disa komuniteteve të tjera ishte më tepër në faktin se ata e rrënuan Novobërdën sesa kontribuan për të. Prandaj, njerëzit që kanë vërtet aleatë ose të paktën mbështeten publikisht dhe me zë të lartë tek aleatët e tyre në Parlamentin Evropian, Komisionin Evropian, BE, në të gjitha trupat ndërkombëtare, ata nuk përpiqen të mbrojnë interesat serbe, ata nuk shqetësohen për të forcuar argumentet tona. Dhe kjo, për mendimin tim, lë përshtypje të keqe edhe te ndërmjetësit. Është e qartë për të gjithë se këtu dikush është duke u strukur dhe duke pritur që kjo çështje të zhduket, e pastaj do të angazhohet në politikë siç e imagjinon se nuk ka Kosovë”, përfundon Smajlloviq.