Sopjani: Pacolli luajti një rol kyç në njohjen e Kosovës nga Kenia duke përdorur lidhjet dhe ndikimin e tij në Afrikë

Avokati dhe ish-kryeinspektori i Agjencisë Kosovare të Inteligjencës (AKI), Shkëlzen Sopjani, ka vlerësuar se rolin kryesor që ka luajtur ish-ministri i Jashtëm i Kosovës, Behgjet Pacolli, ka qenë njohja e pavarësisë së Kosovës nga Kenia.

Sopjani për Kosovo online na kujton se kjo është e vetmja njohje e pavarësisë së Kosovës në pesë vitet e fundit.

"Kjo është një njohje e madhe për Kosovën, veçanërisht sepse vjen nga Kenia, e cila është një nga vendet më të rëndësishme dhe me ndikim në Afrikë. Kjo njohje ka potencialin për të nisur një mundësi të re për Kosovën ndërkombëtarisht, veçanërisht në mesin e vendeve të tjera afrikane që mund të fillojnë ta njohin Kosovën. Kjo është një njohje shumë e rëndësishme sepse, të mos harrojmë, është e vetmja njohje në pesë vitet e fundit dhe mund të jetë një moment i ri sa i përket njohjeve”, tha Sopjani.

Ai ka thënë se Pacolli ka luajtur një rol kyç në këtë proces, duke shfrytëzuar lidhjet dhe ndikimin e tij në Afrikë.

"Pacolli ishte i pari që shpalli njohjen e Kenisë dhe është e qartë se ai ka përdorur kontaktet e tij në atë pjesë të botës. Kjo nuk është hera e parë që angazhimi i tij rezulton me njohjen e Kosovës nga një shtet afrikan", shtoi ai.

Ndonëse e vlerësoi rolin e Pacollit, Sopjani theksoi se ai aktualisht nuk ka mbështetje të konsiderueshme politike në Kosovë.

“Pacolli nuk e ka partinë e tij me ndikim politik, as nuk është zgjedhur dikush nga radhët e tij në zgjedhjet e fundit. Unë nuk e shoh si pjesë të qeverisë së ardhshme”, ka përfunduar Sopjani.