Sorensen: BE-ja shpreson që Komisioni i Përbashkët të kontribuojë në sqarimin e fatit të personave të zhdukur

Përfaqësuesi i posaçëm i BE-së për dialogun Beograd–Prishtinë, Peter Sorensen, njoftoi se më 22 janar, kryenegociatorët e Kosovës dhe të Serbisë, së bashku me të, u takuan për herë të parë në format trilateral të Komisionit të Përbashkët për personat e zhdukur.

Siç thekson ai, themelimi i këtij komisioni është rënë dakord në Deklaratën për personat e zhdukur, të cilën më 2 maj 2023, gjatë një takimi të nivelit të lartë me ndërmjetësimin e Përfaqësuesit të Lartë/Zëvendëspresidentit (HR/VP), e nënshkruan presidenti i Serbisë dhe kryeministri i Kosovës.

“Qëllimi i Komisionit të Përbashkët është mbikëqyrja e zbatimit të Deklaratës për personat e zhdukur, e cila synon të kontribuojë në zbardhjen e fatit të personave të zhdukur të mbetur, përfshirë edhe personat e zhdukur me forcë, të sigurojë mbylljen e këtij kapitulli të dhimbshëm për familjet e tyre dhe të nxisë pajtimin dhe paqen e qëndrueshme. Në përputhje me Termat e Referencës të dakorduara, Komisioni i Përbashkët do të mbështesë punën e Grupit të Punës për personat e zhdukur, i cili drejtohet nga Komiteti Ndërkombëtar i Kryqit të Kuq (KNKK), duke lehtësuar zbatimin e aktiviteteve të palëve, zgjidhjen e mosmarrëveshjeve të mundshme dhe monitorimin e progresit”, thuhet në njoftim.

Ndërmjetësi i BE-së, Kosova, Serbia ose KNKK-ja mund t’i drejtojnë Komisionit të Përbashkët çdo çështje që lidhet me zbatimin, aplikimin dhe interpretimin e Deklaratës për personat e zhdukur, si dhe çdo çështje kontestuese që shfaqet brenda Grupit të Punës të drejtuar nga KNKK-ja.

“Kjo përfshin edhe çështjen e shqyrtimit dhe përditësimit të Termave të Referencës dhe Kornizës së Përgjithshme të Punës së Grupit të Punës për personat e zhdukur, nëse në atë grup nuk arrihet konsensus. Komisioni i Përbashkët do t’i shqyrtojë çështjet brenda kompetencës së tij në përputhje me Termat e Referencës të dakorduara. Çdo vendim mbi çështjet kontestuese që Grupi i Punës nën udhëheqjen e KNKK-së ia paraqet Komisionit të Përbashkët do t’i kthehet atij Grupi të Punës për miratim dhe zbatim”, thekson Sorensen.

Ai nënvizon se Bashkimi Evropian ka pritshmëri të mëdha që Komisioni i Përbashkët do të japë një kontribut të rëndësishëm në sqarimin e fatit të personave të zhdukur dhe do të ndihmojë në mbylljen e këtij kapitulli të dhimbshëm për familjet që prej shumë kohësh presin përgjigje.

“Më 17 dhjetor 2024, kryenegociatorët e Kosovës dhe të Serbisë arritën në Bruksel një marrëveshje për Termat e Referencës për Komisionin e Përbashkët për personat e zhdukur, i cili themelohet në bazë të Deklaratës për personat e zhdukur, të rënë dakord më 2 maj 2023 ndërmjet presidentit të Serbisë, Aleksandar Vuçiq, dhe kryeministrit të Kosovës, Albin Kurti”, përfundon njoftimi.