Petkoviq me Sorensenin: Për përparim të prekshëm në dialog nevojiten hapa konkretë për formimin e AKS-së

Drejtori i Zyrës për Kosovën dhe Metohinë, Petar Petkoviq, u takua sot në Beograd me ndërmjetësin e Bashkimit Evropian për dialogun Beograd–Prishtinë, Peter Sorensen, të cilit i përcolli mesazhin se për çdo përparim të prekshëm në dialog është e domosdoshme të nisin hapa konkretë për formimin e Asociacionit të komunave serbe (AKS) dhe bisedimet për draftin e Statutit të AKS-së.

Petkoviq paralajmëroi posaçërisht se shtyrja e zbatimit të ligjit për të huajt dhe automjetet nuk guxon të jetë kufiri përfundimtar i veprimit të bashkësisë ndërkombëtare ndaj kryeministrit të Kosovës në mandat teknik, Albin Kurti, por se kjo periudhë duhet të shfrytëzohet për gjetjen e një zgjidhjeje të qëndrueshme, me respektimin e marrëveshjeve të arritura në Dialog, veçanërisht atyre që lidhen me lirinë e lëvizjes.

“Prishtina vazhdon me veprime të reja të njëanshme dhe përshkallëzuese. Këtë e dëshmojnë edhe deklaratat e papranueshme dhe dashakeqe të Besnik Bislimit, me të cilat tregohet se Prishtina, në vend të dialogut dhe respektimit të marrëveshjeve të arritura deri më tani, dëshiron të rrezikojë edhe më tej mbijetesën e serbëve dhe të drejtat e tyre për jetë, liri të lëvizjes, të drejtën për trajtim shëndetësor dhe arsimim. Shëndetësia dhe arsimi përbëjnë boshtin e mbijetesës së serbëve në Kosovë dhe Metohi dhe vetë thelbin e Asociacionit të komunave serbe, dhe kështu duhet të mbetet”, theksoi drejtori i Zyrës për KeM.

Po ashtu, Petkoviq nënvizoi se që nga fillimi i vitit po dëshmohet edhe një rritje e numrit të incidenteve të motivuara etnikisht nga ana e Prishtinës, e cila, siç tha ai, bën gjithçka për të krijuar kushte të pamundura për jetesë të serbëve në Kosovë.

Prandaj, theksoi Petkoviq, është e domosdoshme që sa më shpejt të niset formimi i AKS-së dhe Beogradi pret që edhe Bashkimi Evropian të ndërmarrë hapa konkretë në këtë drejtim.