Spahiu: BE nuk është në pozitën që të udhëheqë politikë të pavarur mbrojtëse, varet nga vullneti dhe interesat e SHBA dhe Britanisë së Madhe

Analisti politik dhe profesori nga Kosova Nexhmedin Spahiu thotë se të gjitha planet që janë bërë të ditura nga zyrtarët europianë të cilët parashikojnë koncept të ri mbrojtjeje që përfshin dhe formimin e forcave të armatosura, varet ekskluzivisht nga vullneti dhe interesat e SHBA. 

“Nëse do të jetë në interesin e Amerikës, kjo do të jetë kështu. Pa mbështetjen e SHBA, nuk do të ketë ushtri europiane”, shprehet i prerë Spahiu.

Ky i fundit sqaron se BE vijon të mos jetë në pozitën që të udhëheqë politikë të pavarur ushtarake nga SHBA dhe Britania e Madhe. 

“Bashkimi Europian nuk është në të tillë pozitë që të udhëheqë politikën e vet të pavarur nga Amerika dhe nga Britania e Madhe e cila ka dalë nga BE, por është pak aty në Europë dhe pak në çdo kuptim fuqi. Nëse ky është plani i tyre, nëse kjo përputhet me planet e tyre, atëherë do të jetë”, ka thënë Spahiu.