Teni i shkroi Blinkenit: Kurti po kërcënon sërish paqen, çfarë do të ndërmarrin SHBA-të për të mbrojtur të drejtat e serbëve?

Kongresmenja republikane, Klaudia TenI, i ka dërguar një letër Sekretarit të Shtetit të SHBA-së, Entoni Blinken, në të cilën i ka kërkuar përgjigje pyetjes se çfarë do të bëjnë SHBA-të për të mbrojtur të drejtat e serbëve në Kosovë, pasi që kryeministri i Kosovës, Abin Kurti, siç theksoi ajo, sërish kërcënon paqen përkundër kritikave të Departamentit të Shtetit.

"Përsëri, veprimet e Kurtit kërcënojnë paqen dhe stabilitetin në Ballkanin Perëndimor. Pavarësisht kritikave të ashpra nga Departamenti i Shtetit, veprimet e Kurtit nuk kanë ndryshuar. I kam dërguar një letër Blinkenit duke kërkuar të di se çfarë veprimesh do të ndërmarrë SHBA për të siguruar që të drejtat e serbëve etnikë në Kosovë të mbrohen dhe Kurti të mbajë përgjegjësi”, ka shkruar Teni në rrjetin social “X”.

Teni deklaroi se është thellësisht e shqetësuar për keqtrajtimin e vazhdueshëm të serbëve në Kosovë dhe mungesën e veprimeve nga administrata e Bajdenit.

“Ndërsa vlerësoj deklaratat e fundit të Ambasadës së SHBA-ve në Prishtinë dhe ndihmës sekretarit Xhim O’Brajen, këto deklarata nuk duket se ndryshojnë veprimet e Kurtit. Po kërkoj informacione se çfarë do të bëjë, nëse ai bën, Departamenti i Shtetit për të garantuar respektimin e të drejtave të serbëve në Kosovë, nëse Kurti vazhdon të shkelë normat ndërkombëtare dhe thelbin e Marrëveshjes së Ohrit”, ka thënë Teni, në një letër drejtuar Blinkenit.

Ajo përkujtoi se ditët e fundit qeveria e Kosovës ka ndërmarrë veprime të njëanshme kundër pakicës serbe në Kosovë, duke rrezikuar paqen dhe stabilitetin në Ballkanin Perëndimor, duke thënë se më 30 gusht, Policia e Kosovës ka kryer një aksion kundër institucioneve në zonat me shumicë serbe, të cilat Serbia i mbështet, pa koordinim ndërkombëtar.

Kjo jo vetëm që injoron dialogun e ndërmjetësuar nga BE, por kërcënon edhe paqen dhe stabilitetin në rajon, ushtarët e KFOR-it dhe qytetarët e Kosovës, paralajmëroi kongresmenja.

“E vlerësoj gjuhën e ashpër në deklaratën e ambasadës amerikane, duke përfshirë vërejtjen se këto veprime ‘minojnë reputacionin e Kosovës si një partner i besueshëm ndërkombëtar’, por duket se këto deklarata nuk kanë ndikim të madh në veprimet e Kurtit”, ka thënë Teni.

Ajo kujtoi se në shtator të vitit të kaluar ajo vetë i dërgoi një letër Kurtit duke i kërkuar atij që të deeskalojë situatën dhe të punojë drejt zbatimit të Marrëveshjes së Brukselit nga viti 2013, si përgjigje ndaj krizës që përfshin vendosjen e dhunshme të kryetarëve të komunave në veriu, përkundër mungesës së pjesëmarrjes së popullatës lokale në zgjedhje.

“Besoj se është koha për të konsideruar ushtrimin e më shumë presionit ndaj regjimit të Kurtit, duke përfshirë marrjen në konsideratë të masave specifike ndëshkuese nëse kjo sjellje vazhdon. Përveç kësaj, KFOR-i duhet të intensifikojë përpjekjet e tij për të mbrojtur pakicën serbe në përputhje me mandatin e tij. Në vend që të mbetet një vëzhgues pasiv apo vëzhgues neutral, KFOR-i duhet të marrë një qëndrim më proaktiv duke shtuar patrullat dhe duke parandaluar forcat e armatosura rëndë të Policisë Speciale të Kosovës që të frikësojnë civilët e paarmatosur”, theksoi Teni në letër.