Todiq me komandantin e KFOR-it amerikan: Jeta në Leposaviq është e paralizuar, nuk jemi të sigurt derisa forcat speciale janë këtu

Anëtari i Kryesisë së Listës Serbe, Slavko Simiq dhe ish-kryetari i komunës së Leposaviqit, Zoran Todiq, kanë biseduar me komandantin e KFOR-it amerikan, të cilit sërish ia kanë përcjellë kërkesat që njësiti special i Policisë së Kosovës të tërhiqet dhe kryetari i sapozgjedhur Lulzim Hetemi të largohet nga ndërtesa e komunës, ku ndodhet që nga dje.

Todiq theksoi se serbët e mbledhur para ndërtesës së komunës nuk duan asnjë incident, por vetëm për të siguruar punën e tyre të qetë në institucionet e tyre.

"Jeta në Leposaviq është ndalur, ata erdhën këtu me përdorimin e forcës. Ata mund të shkojnë, që ne t'i kthehemi jetës normale", i tha Todiq komandantit amerikan të KFOR-it, i cili zëvendësoi kontingjentin italian para ndërtesës së komunës së Leposaviqit sot në mëngjes.

Todiq i tha komandantit të KFOR-it se jeta në Leposaviq është e paralizuar, se asgjë nuk funksionon dhe kur është fjala për qytetarët dhe institucionet, shkollat, ndërmarrjet publike dhe institucionet shëndetësore, ata nuk punojnë.

"Të gjitha ato institucione janë të ndërlidhura drejtpërdrejt me funksionimin e komunës sonë. Askush nuk mund ta ushtrojë të drejtën e tij sepse kjo ndërtesë nuk funksionon. Të punësuarit në këtë ndërtesë nuk janë në vendet e tyre të punës", tha Todiq.

Ai përmendi shembullin se në këtë institucion janë pesë të punësuar të cilët kanë të drejtë për pension këtë vit dhe theksoi se pas 40 vitesh punë, sot nuk mund të jenë në vendet e tyre të punës.

“Kërkesa jonë nuk ka ndryshuar që nga dita e djeshme, kërkojmë që personat që janë në ndërtesë të largohen nga ndërtesa që punonjësit të shkojnë në vendet e tyre të punës. Nuk kemi asgjë personale kundër zotëri që është në ndërtesë, le të shkojë në tre fshatra shqiptare ku u votuan, aty ka kushte për të kryer funksionin, dhe ne këtu do të bëjmë gjithçka që kemi bërë gjatë gjithë kësaj kohe. Nuk është e drejtë të zbatohen disa vendime të paarsyeshme dhe antiserbe me përdorimin e forcës. Ky njeri nuk është i mirëpritur, ai nuk e përfaqëson popullin serb. Këtë e tregoi populli serb në ato kuazi-zgjedhje që u mbajtën më 23 prill, në të cilat ai nuk mori pjesë", tha Todiq.

Ai tha se në komunën e Leposaviqit jetojnë serbët si popullatë shumicë, shqiptarët në tri fshatra, goranët, boshnjakët dhe romët dhe se në ato zgjedhje kanë marrë pjesë vetëm banorët e tri fshatrave shqiptare.

Komandanti i KFOR-it tha se dëshirojnë që gjithçka të përfundojë me dialog dhe se shqetësimet dhe kërkesat që serbët i kanë shprehur kryetarit të komunës do t'i përcjellin dhe se shpresojnë që gjithçka të zgjidhet në rrugë paqësore. Ai tha se janë të pranishëm edhe për të mos eskaluar situatën siç ndodhi në Zveçan dhe për të vepruar si ndërmjetës për të arritur një zgjidhje paqësore.

“Ne nuk kemi nevojë për asnjë incident dhe kërkojmë nga ju që të punoni në përputhje me mandatin që është siguri dhe liri për të gjithë banorët. Ne sot nuk jemi të sigurt këtu. Siguria e popullatës sonë është në rrezik këtu, fëmijët tanë nuk shkojnë në shkollën, nuk shkojnë në kopsht. Ne nuk kemi nevojë për këtë”, tha Todiq.

Komandanti i KFOR-it u pajtua dhe tha se nuk dëshiron që të përsëritet situata e djeshme.

Todiq nënvizoi edhe një herë se asnjë nga njerëzit e mbledhur nuk përkrah asnjë lloj dhune, por se po kërkojnë nga KFOR-i që serbët të mund të punojnë, të drejtat themelore të njeriut.

"Këta njerëz nuk kanë besim në shërbimet policore të Kosovës. Ka një zgjidhje, ju jeni ata që duhet të siguroheni që ky popull të jetojë normalisht. Përderisa këtu është policia speciale e Kosovës, ne nuk ndihemi të sigurt", tha Todiq.