Vllajiq: Arrestimi i Millenkoviqit ishte jashtëzakonisht brutal dhe ai nuk ka për çfarë të përgjigjet

Avokati Nebojsha Vllajiq ka thënë sot se arrestimi i trajnerit të klubit të kik-boksit nga Mitrovica e Veriut, Millun Millenkoviq Lune, ishte jashtëzakonisht brutal dhe i kryer jo vetëm me qëllim të arrestimit të një individi, por edhe për të frikësuar komunitetin, transmeton Euronews Serbia.

Vllajiq ka deklaruar se dje e ka vizituar Millenkoviqin, si dhe se ka kërkuar nga prokurori publik që t'i paraqesë provat në bazë të të cilave akuzohen të arrestuarit, por kjo nuk ka ndodhur.

“Milluni nuk ka bërë absolutisht asgjë të keqe dhe nuk ka për çfarë të përgjigjet. Prokurori publik dhe politikanët në Prishtinë nuk e kuptojnë se është e drejtë e qytetarëve të marrin pjesë në protesta. Sigurisht që protestat nuk duhet të jenë të dhunshme, këto protesta nuk ishin të atij lloji, as kjo nuk mund t'i karakterizojë. Por edhe nëse jeni i pranishëm në vendin e ngjarjes, kjo nuk ju bën autor nëse nuk keni bërë asgjë të keqe”, ka shpjeguar Vllajiq.

Vllajiq ka thënë se sot ose nesër duhet të mbahet seanca për caktimin e paraburgimit të Millenkoviqit para gjyqtarit kompetent të Gjykatës Themelore në Prishtinë dhe se më pas do të kërkojnë sërish që të paraqiten provat për arrestimin e tij.

“Duke parë praktikën e tyre në muajt dhe vitet e mëparshme në raste të ngjashme, ata nuk kanë nevojë për prova, ata bëjnë punën e tyre, ata i zbatojnë ligjet ashtu siç mendojnë se duhet, gjë që është krejtësisht antidemokratike”, tha Vllajiq për Tanjug.

Vllajiq shpjegoi se Millenkoviq akuzohet për tri krime - terrorizëm, sulm ndaj personave nën mbrojtje ndërkombëtare dhe rrezikim të dhunshëm të rendit kushtetues dhe se sipas prokurorit publik, këto vepra penale rrjedhin nga ngjarjet e disa muajve më parë përballë Zyra e Komisionit Zgjedhor në Mitrovicë dhe nga protesta qytetare që u mbajt rreth dy javë më parë në Zveçan.