Vllajiq: Debati për shpronësimin është vonuar, baza në Gornji Jasenik tashmë ka përfunduar

Përfaqësuesi ligjor i pronarëve të tokave në komunën Leposaviq dhe Zubin Potok, Nebojsha Vllajiq, theksoi se diskutimi publik për shpronësimin është vonuar, sepse baza në Gornji Jasenik tashmë ka përfunduar, dhe duke folur për diskutimin e sotëm në Zubin Potok, ai vlerësoi se ishte kopje e asaj në Leposaviq.

Vllajiq ka thënë për Kosovo Online se edhe sot nuk kanë marrë përgjigje nga autoritetet e Prishtinës se çfarë dëshiron të ndërtojë qeveria e Kosovës në tokën që është në proces shpronësimi.

“Ky diskutim ishte edhe më i kotë se ai në Leposaviq, sepse në një lokacion tashmë është ndërtuar një bazë policore dhe çdo bisedë për zhvillim ekonomik apo ndërtim rrugësh bie në ujë kur shohim se çfarë është ndërtuar atje”, tha Vllajiq dhe shtoi që zyrtari as që donte ta pranonte.

Sipas tij, qytetarët duhet të përgatiten në periudhën e ardhshme për diçka që do të ndodhë sepse qeveria do të insistojë në zbatimin e vendimeve të saj.

Ai thekson se paditë për Leposaviq dhe Zubin Potok janë dorëzuar në Gjykatën Supreme dhe në Gjykatën Themelore në Prishtinë dhe se pritet që të caktohen seancat dhe diçka më në fund të fillojë të zgjidhet.

“Ky problem duhet të zgjidhet. Qeveria ka arsye të mjaftueshme për të ndalur këto veprime sepse këtu nuk ka as një letër të ligjshmërisë. Gjithçka që është bërë është e paligjshme, madje ky diskutim shërben për të pretenduar ligjshmëri sepse ndërtesat janë ndërtuar më shumë se gjysmë viti më parë dhe sot po diskutojmë për këtë dhe debati publik duhet t'i paraprijë shpronësimit”, përfundoi Vllajiq.