Vuçeviq: Ndërprerja e pagesave në dinarë është mesazhi i Kurtit për serbët se nuk kanë çfarë të kërkojnë në Kosovë

Ministri i Mbrojtjes Millosh Vuçeviq tha se po ndodh erozioni i sistemit të mbrojtjes dhe se Republika e Serbisë çdo vit humb 60 mijë nga ata që largohen nga rezerva e ushtrisë për shkak të moshës dhe pleqërisë dhe fiton vetëm 1500 anëtarë të rinj. Çështja është se cili shtet mund ta përballojë atë, tha Vuçeviq dhe theksoi se kthimi i shërbimit ushtarak nuk ka të bëjë me ngjarjet në KdheM.

Duke komentuar vendimet e fundit të Prishtinës, ministri i Mbrojtjes Millosh Vuçeviq tha se duhet të shikojmë të gjithë pakon e masave të zbatuara nga Prishtina.

“Në KdheM po krijohen kushte të pamundshme, nga depërtimi në institucione, kidnapimet, arrestimet e deri te arrestimi i punëtorëve shëndetësorë dhe po bëhet e pamundur ofrimi bazë i kujdesit shëndetësor për popullin serb në KdheM”, tha Vuçeviq.

Sipas tij, mund të shtohet edhe një sulm ndaj sigurisë ekonomike, heqja e transaksioneve të pagesave me dinarë, që është mesazhi i Kurtit për serbët se nuk kanë çfarë të kërkojnë në Kosovë.

Ai theksoi se Beogradi është vazhdimisht i angazhuar në aktivitete diplomatike, se mbrëmë vonë është mbajtur një takim me Kuintën dhe se bisedimet vazhdojnë edhe sot.

“Nuk na mbetet gjë tjetër veçse të luftojmë për mbijetesën e popullit tonë në Kosovë dhe Metohi. Vijat tona të kuqe janë të njëjta dhe do të doja që të mos kalohen kurrë. Më mirë të bisedojmë, të kërkojmë zgjidhje politike, se sa për të përfshirë një pjesë tjetër të vendit në zgjidhjen e problemeve”, thotë Vuçeviq.

Ai shton se duhet treguar mençuri dhe theksoi se shqiptarët po bëjnë një gabim historik duke keqtrajtuar popullin serb.

"Qëllimi i tyre është që të mos ketë serbë ose të jenë grup minoriteti që duhet të marrësh një lupë për t'i gjetur. Tani nuk ka ambulancë sepse tani ajo ambulancë është ndoshta një "celulë terroriste", ose dinari është problemi më i madh, sikur nuk ka probleme të tjera”, vëren Ministër i Mbrojtjes.

Për të kuptuar situatën, thotë ai, duhet parë e gjithë pakoja e Prishtinës.

I pyetur nëse Kurti do të përballet me pasoja për sjelljen e tij, Vuçeviq thotë se duhet të shohim se cili do të jetë reagimi i bashkësisë ndërkombëtare dhe se deklaratat e zyrtarëve amerikanë janë inkurajuese.

"Të dëgjojmë se çfarë do të thotë presidenti në dy ditët e ardhshme. Kërkesa ime është që të solidarizohemi dhe të heshtim pak me mençuri, ndërsa vendi po lufton për disa gjëra", thotë Vuçeviq dhe thekson se do të dëgjojmë gjëra konkrete nga presidenti.

Ai thekson se është pesimist se bashkësia ndërkombëtare do të ketë sukses ta bindë Kurtin.

“Serbia është e përkushtuar për dialog, Serbia fiton në paqe, Serbia zhvillohet në paqe”, thotë Vuçeviq.

Ai iu referua nismës për rikthimin e shërbimit ushtarak dhe tha se qytetarët duhet të jenë krenarë për vendin e tyre për atë që ka bërë, sepse kjo që kemi tani nuk është e njëjta ushtri si 10 vjet më parë, por mbetet pyetja se si të plotësohen të gjitha njësitë.

Siç tha ai, pas 13 vitesh nga pezullimi i shërbimit ushtarak, pas analizave kemi paraqitur argumentet pse duhet të kthehet detyrimisht shërbimi ushtarak.

“Kthimi i shërbimit ushtarak nuk ka lidhje me ngjarjet në KdheM, kemi gërryerjen e sistemit të mbrojtjes së Republikës së Serbisë, humbim 60 mijë veta që largohen nga ushtria rezervë për shkak të moshës dhe kemi vetëm 1.500 anëtarë të rinj. Pyetja është se cili vend mund ta përballojë këtë”, thotë Vuçeviq.

Ministri i Mbrojtjes nuk ka dashur të spekulojë për zgjidhje të reja kadrore dhe ka thënë se për këtë do të diskutohet më shumë pas konstituimit të Kuvendit.