Vuçiq: Do të dërgojmë delegatë në Afrikën Lindore, për 10 deri në 15 ditë do të befasojmë me një shtet nga ai rajon

Presidenti i Serbisë, Aleksandar Vuçiq, theksoi sot, në lidhje me njohjen e Kosovës nga Kenia, se për dy vjet e gjysmë autoritetet kosovare, së bashku me disa vende të Evropës Perëndimore, kanë punuar për këtë çështje. Ai gjithashtu njoftoi se në 10 deri në 15 ditët e ardhshme, Serbia do të “bëjë një befasi” me një shtet nga ai rajon, pranë Kenias.

"Ne jemi përpjekur dhe kemi luftuar në çdo mënyrë për ta ndaluar këtë proces. Prej dy vjet e gjysmë kanë punuar në Kenia, dhe me ta edhe disa vende të Evropës Perëndimore, të cilat kanë dërguar drejtpërdrejt përfaqësuesit e tyre të lartë në Nairobi. Kanë punuar për këtë çështje edhe në rastin e Rezolutës për Srebrenicën. Atëherë arritëm të fitonim qëndrimin e përmbajtur të Kenias, gjë që për shumëkënd ishte një surprizë", shpjegoi Vuçiq në emisionin "Oko" në RTS.

Ai theksoi se ka biseduar me Uilliam Ruto, njeriun që zëvendësoi presidentin Keniata.

"Kam biseduar me të në Nju Jork, e luta që të mos e bënte këtë, pavarësisht se e dija nën çfarë presioni të madh ishin për ta bërë. Kenia e bëri këtë, dhe e patë edhe aktorin kryesor të asaj që ndodhi. Nga njëra anë ishte Pacolli, por mos harroni se bëhet fjalë për vende të mëdha të Evropës Perëndimore, të cilat ndihmuan në arritjen e njohjes së pavarësisë së Kosovës. Kenia e bëri këtë dhe e pamë aktorin kryesor, Behgjet Pacollin, por mos harroni se mbështetja erdhi nga vendet e mëdha perëndimore", theksoi Vuçiq.

Ai vuri në dukje se është krenar për faktin se gjatë qeverisjes së tij 28 shtete kanë tërhequr njohjen e Kosovës, në krahasim me ata që, siç tha ai, vetëm kritikojnë, ndërsa gjatë kohës së tyre 92 vende e njohën Kosovën dhe asnjë nuk e tërhoqi njohjen.

"Ata kërkojnë fajtorin tek gjithçka dhe tek të gjithë, dhe tani fajin e paska Tamara Vuçiq, për faktin se ishte në Kenia pesë muaj më parë. Kjo flet më shumë për ta, ndërsa ajo thjesht e kreu punën e saj në mënyrë serioze", shtoi presidenti i Serbisë.

Vuçiq ka bërë të ditur se Serbia do të vazhdojë të luftojë dhe se rezultatet do të shihen së shpejti, se janë në pritje të lejes për publikim.

Ai tha se Serbia është nën presion nga të gjitha anët, e ngjyrosur nga një revolucion nga brenda dhe shtoi se ka edhe problem me NIS, për të cilin sanksionet do të hyjnë në fuqi nesër.

Ai theksoi se shpreson në shtyrjen e sanksioneve, por shtoi se nuk beson në të.

Ai theksoi se edhe në rajon ka shumë probleme.

"Tani edhe ne e kemi këtë problem dhe duhet të dërgojmë delegatët tanë në Afrikën Lindore ku Kenia ka ndikimin e saj. Ne do të flasim me të gjithë nga Afrika Lindore për të parë që kjo të mos përhapet. Dhe pastaj në 10 deri në 15 ditët e ardhshme do të befasojmë me një vend nga ai rajon, afër Kenisë, dhe një tjetër me të cilin do të befasojmë sërish fuqitë e mëdha”, tha presidenti Vuçiq.

Gjetja e një zgjidhje kompromisi është e mundur vetëm për Banjalukën dhe Sarajevën

Vuçiq tha se Serbia tashmë ka dërguar kundërshtime në Interpol në lidhje me mandatin e lëshuar për presidentin e RS-së Millorad Dodik dhe kryetarin e Kuvendit të RS-së Nenad Stevandiq, sepse ata janë shtetas të Serbisë.

“Tashmë kemi vepruar, sepse edhe Dodik edhe Stevandiq janë shtetas të Serbisë dhe kemi dërguar vërejtje nga Interpoli se fletë-arresti duhet të shfuqizohet sepse është çështje politike. Do të duhen disa ditë që ata të përgjigjen dhe më pas do të shohim nëse pranojnë apo refuzojnë. Lutja ime është që të gjithë të kuptojnë se sa e padurueshme është kjo, për fat të keq, nuk jam i sigurt që të gjithë më kanë dëgjuar, edhe pse e kanë dëgjuar. Pikëpamjet që kam dëgjuar janë se ata janë ende duke i konsideruar ato”, theksoi ai.

Ai nënvizoi se është mirë që edhe në Serbi edhe në botë e kuptojnë se sa e patolerueshme është të ndiqet presidenti, kryetari i parlamentit dhe kryeministri i një subjekti.

"Fatkeqësisht, nuk jam i sigurt se të gjithë më dëgjuan, megjithëse më dëgjuan, dhe në atë lojë do të thosha se mënyra më e mirë për të përcaktuar pikëpamjet që dëgjova ishte se ata janë ende duke i konsideruar ato dhe do të shohim se çfarë do të bëhet më në fund. Besoj se gjetja e një zgjidhjeje kompromisi është e vetmja gjë e mundshme për Banja Lukën, për Sarajevën dhe për komunitetin ndërkombëtar. Nëse kjo nuk ndodh, jemi afër një fatkeqësie të plotë”, paralajmëroi Vuçiq.

Për herë të parë, dy figurat më të fuqishme në BE organizuan darkë për presidentin e Serbisë, dhe kjo disa i shqetëson

Duke komentuar bisedimet me presidenten e Komisionit Evropian, Ursula von der Lejen, dhe presidentin e Këshillit Evropian, Antonio Koshta, presidenti serb Aleksandar Vuçiq tha se ishte hera e parë në histori që dy figurat më të fuqishme të BE-së organizuan një darkë për presidentin e Serbisë. Megjithatë, ai vuri në dukje se disa nuk janë të kënaqur që Serbia gëzon një respekt të tillë në Evropë dhe botë, gjë që, sipas tij, është për të ardhur keq.

"Më pritën Antonio Koshta dhe Ursula von der Lejen, vetëm mua. Ne të tre ishim vetëm në takim, dhe pastaj dëgjova që shumë njerëz, si Schieder dhe të tjerë, sajuan se çfarë ishte diskutuar në atë takim. Nuk e di si mund ta dinin, sepse nuk kishte askënd tjetër në takim, as nga bashkëpunëtorët e mi", tha Vuçiq.

Ai shtoi se nuk është dakord për gjithçka me zyrtarët evropianë.

"Jam dakord me atë që thanë ata, ishte një takim i shkëlqyer, ne e kuptuam cilat janë detyrat tona. Unë thashë se çfarë mendoj për disa veprime të BE-së", tha presidenti i Serbisë.

Ai theksoi se rruga evropiane është jashtëzakonisht e rëndësishme për Serbinë, e cila duhet të përforcojë përpjekjet dhe të punojë më me zell për përmbushjen e detyrimeve të saj.

Vuçiq tha gjithashtu se Von der Lejen dhe Koshta nuk kanë folur për një qeveri kalimtare.

"Kishim një bisedë të mirë, të rëndësishme, dhe mendoj se Serbia do të ketë përfitime nga kjo. Besoj se së shpejti do të bëhemi anëtarë të SEPA-s", tha Vuçiq.

Ai shtoi se problemi i Serbisë sot është rënia e prodhimit industrial me 1.8%.

"Kjo është pasojë e bllokadave dhe sjelljes së papërgjegjshme të njerëzve. Për herë të parë kemi një rënie në turizëm, probleme për të mbajtur vlerësimin e kreditit dhe vështirësi në shumë fusha. Kur shkatërroni vendin tuaj, duhet t'u tregoni njerëzve se cilat janë pasojat", tha Vuçiq.

Nga e hëna konsultime për qeverinë e re

Vuçiq njoftoi se të hënën do të fillojnë konsultimet për përbërjen e qeverisë së re.

"Do të shohim çfarë do të thonë ata që kanë shumicën, nëse duan të formojnë një qeveri të re apo të shkojnë në zgjedhje. Po pres që përfaqësuesit e shumicës të më thonë së pari nëse duan një qeveri të re apo të skadojë afati dhe të shkojmë në zgjedhje", tha presidenti.

Sa i përket mandatit, ai tha se nuk është ai që vendos, por kryetari i SNS-së, Millosh Vuçeviq, dhe drejtuesit e asaj partie.