Vuçiq: Do të jetë e vështirë, të gjithë të mëdhenjtë në Perëndim janë kundër nesh, por ne kemi ligjin dhe drejtësinë në anën tone

Presidenti serb Aleksandar Vuçiq ka thënë para takimit me kryeministrin e Kosovës Albin Kurti në Bruksel se ligji dhe drejtësia janë në anën e Serbisë dhe se të gjithë të mëdhenjtë në Perëndim janë kundër Serbisë dhe se kjo pasdite do të jetë e vështirë për shkak të kësaj.

Vuçiq ka postuar një video në llogarinë në Instagram “buducnostsrbijeav” në të cilën ka thënë se prej disa ditësh, sidomos dje dhe sot, Kurti po zhvillon një fushatë “brutale dhe të pistë” kundër Serbisë.

Siç thotë ai, Kurti dhe ndihmësit e tij janë duke bërë fushatë, dhe “kanë përfshirë të gjithë nga Shaip Kamberi e deri te Azem Vllasi, të gjithë analistë dhe politikanë”.

“Kërcënojnë Serbinë, kujtojnë kohët e vjetra, flasin për luftën e tyre për liri, duke harruar se serbët luftuan për liri, jo vetëm kundër terroristëve, por edhe kundër agresorëve të NATO-s. Siç thotë ai, gjaku i derdhur nuk kthehet, gjaku i derdhur për liri nuk mund të kthehet dhe të harrohet. Këtë do ta mbaj parasysh sidomos sonte. Rroftë Serbia, nuk ka dorëzim”, tha Vuçiq.

"Kundër nesh janë të gjithë të mëdhenjtë në Perëndim. Megjithatë, në anën tonë janë ligji dhe drejtësia. Edhe më e rëndësishme se kaq, ata nuk e kuptojnë se sa e fortë është dashuria për lirinë dhe sa fort dhe vendosmërisht mund ta ruash atë, pavarësisht nga të gjitha presionet. Rroftë Serbia”, ka thënë Vuçiq.