Vuçiq: Jam i tmerruar nga armatosja e Prishtinës nga ana e Turqisë, e kemi kuptuar mirë mesazhin

Presidenti i Serbisë, Aleksandar Vuçiq, ka vlerësuar pas armatosjes së Prishtinës me dronët turq “Skydagger 15” se është i tmerruar nga sjellja e Turqisë dhe, siç ka theksuar, nga shkelja brutale e Kartës së Kombeve të Bashkuara dhe Rezolutës 1244 të Këshillit të Sigurimit të OKB-së, duke theksuar se Serbia është një vend i vogël, por e ka kuptuar mirë mesazhin.

Vuçiq ka shkruar në platformën “X” se tani është plotësisht e qartë që Turqia nuk dëshiron stabilitet në Ballkanin Perëndimor dhe se po ëndërron përsëri për ringjalljen e Perandorisë Osmane.

“Jam i tmerruar nga sjellja e Turqisë dhe nga shkelja brutale e Kartës së OKB-së dhe Rezolutës 1244 të Këshillit të Sigurimit, si dhe nga vazhdimi i armatosjes së autoriteteve të Prishtinës. Tani është plotësisht e qartë se Turqia nuk dëshiron stabilitet në Ballkanin Perëndimor dhe se po ëndërron përsëri ringjalljen e Perandorisë Osmane. Serbia është shtet i vogël, por ne e kemi kuptuar mirë mesazhin,” ka theksuar Vuçiq.

Kryeministri i Kosovës në mandat teknik, Albin Kurti, ka deklaruar se me dronët kamikazë “Skydagger 15”, të cilët kanë mbërritur sot në Kosovë, forcohet dhe zmadhohet fuqia goditëse e Forcës së Sigurisë së Kosovës (FSK), me synimin për të ndërtuar një forcë të aftë dhe të përshtatur me zhvillimet e reja teknologjike dhe taktikat e luftës moderne.

Kurti ka theksuar se kontrata është nënshkruar në dhjetor të vitit të kaluar me kompaninë turke Baykar.

Turqia në tetor ka marrë përsëri komandën e rotacionit të KFOR-it në Kosovë dhe, në të njëjtën kohë, vitin e ardhshëm do të jetë nikoqire e samitet të NATO-s, për çka ka raportuar edhe Kosovo online në analizën e saj.