Vuçiq: Kurti nuk do t’ua bënte këtë serbëve po të mos ia kishin lejuar nga Perëndimi

Presidenti i Serbisë, Aleksandar Vuçiq, deklaroi sot se serbët në Kosovë po përjetojnë terror, jo vetëm nga Albin Kurti, por edhe, siç tha ai, nga ndihmësit e tij në Perëndim, dhe se Kurti nuk do t’ua bënte serbëve të gjitha ato që po ua bën, po të mos ia kishin lejuar. Letrën e paralajmëruar drejtuar sekretarit të përgjithshëm të NATO-s, Mark Rutte, tha se do ta dërgojë sonte.

Pas konstatimit të gazetarit se serbët në Kosovë jetojnë në pasiguri, sepse çdokush mund të arrestohet dhe më pas duhet të dëshmojë se është i pafajshëm, Vuçiq u përgjigj se ata nuk mund ta bëjnë as këtë, pasi praktikisht barra e provës është zhvendosur tek të arrestuarit, në vend që të jetë tek ata që i ndjekin penalisht.

„Bëhet fjalë për terror, jo vetëm të Albin Kurtit, por edhe të ndihmësve të tij nga Perëndimi. Nuk e kam problem ta them këtë të vërtetë. Të gjitha këto i bëjnë së bashku“, është i bindur Vuçiq.

Ai theksoi se ekziston nervozizëm i madh, sepse kanë kaluar 18 vjet që kur Perëndimi e njohu Kosovën, ndërsa Serbia nuk e ka njohur dhe nuk do ta njohë.

„Menduan se gjithçka po u shkonte mire, e shkatërruan RFJ-në dhe Bashkësinë Shtetërore të Serbisë dhe Malit të Zi, si kusht që Kosova të mund ta shpallte pavarësinë. Menduan se e shkëputën Kosovën nga Serbia, por Serbia ende nuk e ka pranuar këtë. Dhe nuk do ta pranojë, këtë ua them hapur në sy“, tha Vuçiq.

Prandaj, theksoi ai, mendojnë se mund ta shantazhojnë Serbinë dhe të gjithë serbët duke i keqtrajtuar, poshtëruar, arrestuar dhe terrorizuar.

„Sa shkrime publikuan se Nenad Rashkoviq ishte rrahur sepse kishte borxh nga bixhozi dhe se e kishin rrahur serbët... Publikuan qindra shkrime, ndërsa dje u detyruan të pranonin se po hetojnë dy policë për shkak se e kishin torturuar në atë mënyrë atë njeri... Çfarë gënjeshtarësh dhe maskarenjsh janë, nuk janë njerëz. Maskarenj të njëjtë janë edhe ata që i mbështesin dhe që ua hapin urën mbi Ibër. Të njëjtë, madje edhe më të këqij. Për më tepër, shtiren si naivë dhe të marrë, sikur nuk e shohin këtë. Edhe komandanti i Kforit dhe të gjithë të tjerët shtiren si të marrë“, tha Vuçiq.

Vuçiq theksoi se sonte do t’i dërgojë letër sekretarit të përgjithshëm të NATO-s, Mark Rutte, lidhur me vendimin për tërheqjen e Kforit nga ura mbi Ibër.

Ai nënvizoi se Albin Kurti nuk do t’ua bënte serbëve ato që po ua bën, po të mos ia kishin lejuar nga Perëndimi.

„Ia kanë lejuar të gjitha, sepse janë nervozë që Kosova nuk është e pavarur. Krenohen me shtetin, por nuk mund të shkojnë në dy të tretat e vendeve të botës. Duan të shkojnë në Rusi – jo, xhaxhi, nuk munden, në Kinë, vendin numër një ose dy – jo, xhaxhi, nuk munden. Kudo që të nisen në Afrikë – jo, xhaxhi, nuk munden. Vetëm gjashtë nga 55 vende të Afrikës e kanë njohur Kosovën. Kështu që nuk mund të shkojnë askund. Mund të shkojnë në Evropën që e bombardoi Serbinë, së bashku me SHBA-në“, shpjegoi Vuçiq.

Ai tha se, për këtë arsye, Serbia duhet të udhëheqë një politikë të përgjegjshme dhe serioze, të kujdeset që ekonomia të rritet dhe të përcaktojë se cilat janë interesat e saj.

„Nuk do t’i dëbojnë njerëzit me traktorë“, theksoi Vuçiq.

Duke iu përgjigjur kritikave ndaj Marko Gjuriqit, ai nënvizoi se Gjuriq e njeh shumë mirë Kosovën.

„Ditën kur të mos ekzistojë Lista Serbe, nuk do të ketë më as serbë në Kosovë. Do të mbeten vetëm Rashiqi dhe të dëgjueshmit e tij. Nuk e kam fjalën për Listën Serbe si të tillë, por për dikë që përfaqëson Beogradin në Kosovë dhe popullin serb“, shpjegoi Vuçiq.

I pyetur për hidrocentralin në Ibër, ai theksoi se ishte sulmuar kur kishte përmendur nismën e komunitetit boshnjak të vitit 2002 për ndërtimin e hidrocentralit në Ribariq.

„Më thanë se kjo ishte si armë bërthamore dhe se unë doja ta shkatërroja Kosovën shqiptare“, kujtoi presidenti kritikat.

Ai pyeti se çfarë duan njerëzit në Serbi, paqe apo luftë, sepse nuk mund të duan herë njërën dhe herë tjetrën.

Ai theksoi se kushdo që drejton shtetin duhet të kujdeset për të gjitha këto.

I pyetur se kur do të mblidhet ekipi i paralajmëruar i ekspertëve, ai tha se bëhet fjalë për një çështje komplekse, e cila duhet të shqyrtohet më thellësisht dhe në mënyrë më profesionale.

Ushtria e Serbisë së shpejti do të ketë 40 avionë luftarakë

Vuçiq më herët paralajmëroi se Ushtria e Serbisë, e cila 12 ose 13 vjet më parë kishte vetëm një avion që mund të ngrihej në ajër, së shpejti do të ketë madje 40 avionë luftarakë.

„Kishte vetëm një avion luftarak. Pa llogaritur MiG-21, të cilët ishin arkivole fluturuese sapo ngriheshin në ajër... Ata ishin arkivole fluturuese edhe në vitin 1999, por ne duhej ta mbronim vendin. Megjithatë, e gjithë kjo ishte një hiç i madh. Ndërsa së shpejti do të kemi 40 avionë luftarakë, pa folur për sistemet raketore, hedhësit shumëtytësh të raketave dhe për gjithçka tjetër që së shpejti do të mund ta shihni“, u tha Vuçiq gazetarëve në Kurshumli, ku vizitoi repartin e fabrikës „Jumko“.

Ai vuri në dukje se punëtorët e „Sistemeve të Ndërlikuara Luftarake“ në Kurshumli punojnë me përkushtim dhe se kanë arritur rezultate edhe më të mira se fabrika në Pllanë e Madhe.

„Edhe në Kurshumli do t’i prodhojmë të gjitha sistemet që kemi prodhuar në Pllanë e Madhe, në mënyrë që t’u krijojmë mundësinë atyre të prodhojnë edhe sisteme të tjera – Millosh, Millosh 2, Lazar, për sistemet PASARS dhe disa pajisje të tjera, shasi apo pjesë pajisjesh“, tha presidenti i Serbisë.