Vuçiq me Sançezin: Mbështetje parimore e Spanjës për integritetin territorial të Serbisë

Presidenti i Serbisë, Aleksandar Vuçiq, u takua sot në Sevilje me kryeministrin e Spanjës, Pedro Sançez, të cilit i shprehu mirënjohje për mbështetjen e qëndrueshme dhe parimore të kësaj shteti për integritetin territorial dhe sovranitetin e Serbisë.

"Diskutuam hapur për të gjitha temat e rëndësishme me mikun tim Pedro Sançez. Folëm edhe për nënshkrimin e marrëveshjes për ndërtimin e urës pranë Baçka Palankës, e cila do të kishte rëndësi për tërë rrethin e Baçkës së Jugut," shkroi Vuçiq në Instagram. Ai ndodhet në Sevilje në Konferencën Ndërkombëtare të Kombeve të Bashkuara për financimin e zhvillimit.

Temë e bisedës me kryeministrin spanjoll ishte edhe situata aktuale në botë, e ardhmja evropiane e Serbisë, si dhe forcimi i dialogut politik, marrëdhënieve bilaterale, bashkëpunimit ekonomik dhe në të gjitha fushat e jetës shoqërore.

"Këmbyem mendime për temat kyçe të Konferencës, përfshirë reformën e arkitekturës globale financiare, mobilizimin e fondeve për zhvillim të qëndrueshëm dhe rëndësinë e financimit të klimës. U dakorduam që janë të nevojshme hapa konkretë dhe më shumë solidaritet për të mundësuar qasje më të barabartë të vendeve në zhvillim te burimet financiare," shtoi Vuçiq.

Ai theksoi se gjithmonë është kënaqësi të bisedosh me një njeri që i kupton parimet e së drejtës ndërkombëtare dhe të sovranitetit, dhe për këtë arsye i shprehu falënderim për mbështetjen e qëndrueshme dhe parimore të Spanjës për integritetin territorial dhe sovranitetin e Serbisë.

"Besoj se në vitet që vijnë do t’i thellojmë edhe më shumë marrëdhëniet tona, në frymën e solidaritetit, mirëkuptimit të ndërsjellë dhe vlerave evropiane që ndajmë," përfundoi Vuçiq.

Gjatë takimit plenar, Vuçiq do t'u drejtohet udhëheqësve të vendeve pjesëmarrëse në Konferencë, ku do të diskutohet financimi i zhvillimit të qëndrueshëm dhe temat me rëndësi për harmonizimin e axhendave të zhvillimit të Kombeve të Bashkuara, institucioneve financiare ndërkombëtare dhe aktorëve të tjerë përkatës në këtë fushë.

Presidenti i Serbisë do të zhvillojë një sërë takimesh dypalëshe me udhëheqësit e vendeve pjesëmarrëse në këtë takim, dhe me ftesë të Mbretit Filip VI dhe Mbretëreshës Letizia të Spanjës, ai do të marrë pjesë në darkën e organizuar nga çifti mbretëror për krerët e shteteve dhe qeverive.