Vuçiq: Serbia do të jetë gjithmonë me serbët në Kosovë dhe Metohi

Presidenti serb Aleksandar Vuçiq ka bërë të ditur sot nga Kina se është jashtëzakonisht e rëndësishme që Serbia të vazhdojë dialogun me Kosovën, ndonëse ajo është e vetmja palë që aspiron për këtë, pasi siç thekson, Albin Kurti asnjëherë nuk ka dashur bisedime.

“Mendoj se është e rëndësishme të kemi një dialog dhe bisedë, edhe pse Albin Kurti kurrë nuk e ka dashur dialogun. Po, ne e dëshirojmë, e dëshirojmë BKS, zbatimin e marrëveshjeve, mbi të gjitha Marrëveshjen e Brukselit, e cila ishte e vetmja e nënshkruar gati 10 vjet më parë. Kam frikë se nuk kemi një bashkëbisedues për këtë, por edhe biseda më e keqe është më mirë se pa bisedë”, tha Vuçiq në një deklaratë për gazetarët në Kinë.

Sa i përket titujve në media të caktuara se ai tani po i detyron serbët nga Kosova të votojnë, Vuçiq ka theksuar se edhe më herët ka qenë pro që populli serb të shkojë në zgjedhje në veri.

Megjithatë, atëherë, siç thotë ai, e ka përkrahur vendimin e popullit, i cili nuk ka qenë në përputhje me qëndrimin e tij.

“Unë kam qenë për pjesëmarrje në zgjedhje, serbët nga Kosova dhe Metohija nuk kanë qenë dhe pastaj kam dalë dhe kam thënë se e mbështes çdo vendim të tyre. Do t'ju kujtoj se tashmë kam thënë se do të mbështes çdo vendim të serbëve nga Kosova e Metohija, edhe nëse nuk është në interesin e tyre dhe as në interesin tonë të përgjithshëm. Sepse duhet të jesh me ata njerëz kur është e vështirë dhe kur është e lehtë”, tha Vuçiq.

Ai beson se shumë politikanë në Serbi, pas ngjarjeve tragjike në Banjskë, u kthyen kundër popullit të tyre dhe filluan të sulmojnë serbët.

“Nuk e kam bërë këtë, edhe pse më e vështira për mua, edhe pse nuk kam fjetur natën, nuk e kam fjalën në kuptimin e drejtpërdrejtë, por për presione politike. Duhet të jesh i ashpër dhe i fortë kur njerëzit e tu e kanë të vështirë, jo vetëm kur është e lehtë. Ju e dini se si është kur ka shumë argëtim dhe të gjithë ecin mirë, atëherë ju keni 500 prej tyre që vijnë në festat tuaja për ditëlindje dhe gjithçka. Dhe kur keni demonstrata para shtëpisë tuaj dhe kur është e vështirë, mezi keni një ose dy njerëz që të mblidhen dhe t'ju thonë diçka”, tha Vuçiq.

Ai ka theksuar se nuk po i bind serbët, por se ka vlerësuar se rrethanat janë të favorshme dhe se do të ishte mirë që ata të mendojnë për zgjedhjet.

Ai beson se opozitës në Serbi asnjëherë nuk i intereson asgjë që thotë dhe se e kanë sulmuar më parë sepse nuk i ka përkrahur zgjedhjet, por tani e sulmojnë sepse i përkrah.

“Asgjë nuk është e mirë nga ajo që thotë Vuçiq”, përmbyll  Vuçiq.