Vuçiq: Serbia është gjithmonë e gatshme për dialog, është e nevojshme që Prishtina të formojë BKS

Presidenti i Serbisë, Aleksandar Vuçiq, pas takimit me të dërguarin e posaçëm të BE-së për dialogun ndërmjet Beogradit dhe Prishtinës, Miroslav Lajçak, tha se Serbia është gjithmonë e gatshme për dialog dhe respekt për gjithçka që është nënshkruar dhe rënë dakord.

Siç njofton Shërbimi Mediatik i Presidentit të Republikës, Vuçiq ka ripërsëritur se Serbia avokon për deeskalim, paqe dhe stabilitet, të cilat janë të nevojshme për të siguruar mbijetesën e serbëve në Kosovë.

“Presidenti Vuçiq edhe një herë e informoi në detaje përfaqësuesin special të BE-së për peshën e situatës me të cilën ballafaqohen serbët, si në veri ashtu edhe në jug të Ibrit”, thuhet në njoftim.

Ai shprehu shpresën se procesi i mëtutjeshëm i dialogut do të çojë në rezultate.

“Gjatë takimit të sotëm, Vuçiq ka insistuar në formimin e Bashkësisë së Komunave Serbe dhe janë diskutuar tema të tjera të rëndësishme në kuadër të dialogut ndërmjet Beogradit dhe Prishtinës”, thuhet në deklaratë.

Me takimin Vuçiq-Lajçak, i cili zgjati më shumë se një orë, i dërguari special evropian përfundoi vizitën e tij në Beograd, ndërsa paraprakisht u takua edhe me drejtorin e Zyrës për Kosovë e Metohi, Petar Petkoviq.

Pas takimit me Lajçakun, Petkoviq deklaroi se takimi Vuçiq-Lajçak ishte serioz, si dhe se Beogradi pranoi ftesën e Lajçakut për të rifilluar bisedimet në Bruksel pas dy ditësh, ku do të diskutohet teksti i statutit të BKS-së.

Më 7 nëntor, Lajçak ishte në Prishtinë, ku u takua me kryenegociatorin e Prishtinës, Besnik Bislimi, si dhe me përfaqësues të opozitës në Kosovë, ndërsa ka munguar në takimin me kryeministrin e Kosovës Albin Kurti.