Vuçiq: Për Serbinë është e rëndësishme të ketë marrëdhënie shumë të mira me SHBA-të

Presidenti i Serbisë, Aleksandar Vuçiq, ka deklaruar sot se për Serbinë është e rëndësishme të ketë marrëdhënie shumë të mira me Shtetet e Bashkuara të Amerikës dhe se Serbia do të përpiqet t’i zhvillojë dhe t’i përmirësojë ato, edhe pse kjo nuk është gjithmonë plotësisht e thjeshtë. Ai shtoi se beson që së shpejti edhe çështja e tarifave doganore amerikane ndaj Serbisë do të hyjë në rendin e ditës në Uashington dhe se ky problem do të zgjidhet në periudhën e ardhshme.

Vuçiq, duke iu përgjigjur pyetjes së gazetarëve nëse biseda e ministrit të punëve të jashtme, Marko Gjuriq, në Uashington me shefin e diplomacisë amerikane është një epokë e re në marrëdhëniet Serbi–SHBA, tha se Serbia do të shikojë që marrëdhëniet me SHBA-të të jenë sa më të mira të jetë e mundur.

“Ne kemi pasur disa biseda me zyrtarë amerikanë. E fundit ka qenë biseda e zotit Gjuriq me sekretarin Rubio. Për ne është e rëndësishme të kemi marrëdhënie shumë të mira me SHBA-të. Do të përpiqemi t’i zhvillojmë, do të përpiqemi t’i përmirësojmë, edhe pse kjo nuk është gjithmonë plotësisht e thjeshtë, sepse ne jemi një vend i vogël, ata janë një superfuqi, ata kanë interesat e tyre, të cilat të paktën në një çështje nuk janë në përputhje me interesat tona”, tha presidenti Vuçiq pas pritjes së sportistëve të rinj pjesëmarrës në kampin “Serbia të thërret 2025”.

Ai shtoi se po diskutohen edhe çështjet që lidhen me tarifat dhe se beson që në periudhën e ardhshme, meqenëse Serbia nuk ka qenë prioritet për shkak të volumit të vogël të përgjithshëm të shkëmbimeve tregtare, kjo çështje do të hyjë në rendin e ditës në Uashington dhe se do të arrihet zgjidhja edhe e kësaj çështjeje në periudhën e ardhshme.

Serbia nuk ndërhyn në vendimet e udhëheqjes së Republikës Sërpska.

Vuçiq deklaroi gjithashtu se Serbia nuk ndërhyn në veprimet konkrete taktike apo në ndonjë veprim tjetër që ndërmerr udhëheqja e Republikës Sërpska ose forcat politike në Republikën Sërpska.

“Detyra jonë është të tregojmë për të drejtën, për mosrespektimin e së drejtës, për respektimin dhe mosrespektimin e Marrëveshjes së Dejtonit. Në këtë mënyrë dhe për këtë çështje, Republika Sërpska gjithmonë mund të llogarisë në mbështetjen e Serbisë,” tha ai duke iu përgjigjur pyetjes së gazetarëve nëse Serbia e mbështet njoftimin e presidentit të Republikës Sërpska, Millorad Dodik, për mbajtjen e një referendumi, pasi atij iu hoq mandati.

Ai theksoi se qëndrimi i Serbisë duhet të ndryshojë, se Serbia e kupton kompleksitetin e situatës dhe problemet e panumërta që ekzistojnë tani, por të shpresojmë që gjërat do të zgjidhen në mënyrë paqësore dhe se stabiliteti rajonal do të ruhet plotësisht.

"Do të doja që disa në bashkësinë ndërkombëtare ta kuptojnë më mirë nevojën për bisedë dhe dialog, në vend që të marrin vendime të shpejta. Nuk prisja asgjë më të mirë nga ata në Sarajevë, kështu që ky do të jetë qëllimi i Serbisë në periudhën e ardhshme", tha Vuçiq.