Zhiofe: Veprimet e pakoordinuara të Prishtinës nuk kontribuojnë në progres, por krijojnë tensione

Shefi i delegacionit të Bashkimit Evropian në Serbi, Emanuele Zhiofre, ka theksuar se një sërë veprimesh të pakoordinuara nga Prishtina nuk kontribuojnë në progres, por krijojnë tensione shtesë në terren, duke thënë se është e nevojshme t'i rikthehet zbatimit të marrëveshjeve të dakorduara dhe të formojnë AKS.

“Ne kemi parë që Prishtina ka ndërmarrë një sërë veprimesh të pakoordinuara që nuk kontribuojnë në progres dhe krijojnë tensione në terren. Ne kemi qenë shumë të qartë në deklaratat tona në publik, në biseda private, por kryesore është se ne duhet t'i kthehemi zbatimit të asaj që është rënë dakord vitin e kaluar dhe vitet e mëparshme dhe të zbatojmë të gjitha obligimet, duke përfshirë edhe formimin e Asociacionit të Komunave Serbe”, tha Zhiofre për RTS.

Lidhur me mbylljen e institucioneve serbe në veri të Kosovës, ai thekson se është e nevojshme që BE-ja të sigurojë që njerëzit që jetojnë në Kosovë të marrin shërbimet e nevojshme, të kenë një jetë normale dhe të kenë qasje në gjithçka që u nevojitet.

“Ky është qëndrimi i BE-së dhe ne gjithashtu do të përdorim Planin e Rritjes për të shkuar në drejtimin e duhur kur është fjala për normalizimin e marrëdhënieve ndërmjet Beogradit dhe Prishtinës”, tha ai.

Siç thotë ai, normalizimi i marrëdhënieve është një nga çështjet kyçe të integrimit evropian.

"Ne jemi të sigurt se procesi i normalizimit të marrëdhënieve ndërmjet Beogradit dhe Prishtinës ka qenë gjithmonë një faktor kyç në negociata dhe do të mbetet i tillë. Edhe në kuadër të Planit të Rritjes presim që të dyja palët t'i përmbushin të gjitha obligimet në rrugë për normalizimin, për të përmbushur të gjitha marrëveshjet, duke përfshirë edhe atë të vitit të kaluar tha Zhiofre.