Merdari: Pas bllokadës në Rudar, intensiteti i trafikut është ulur, kalojnë vetëm makinat e pasagjerëve

Pas bllokimit të rrugës kryesore Nish-Prishtinë në Rudar, afër Kurshumlisë, intensiteti i trafikut në vendkalimin administrativ Merdar nga drejtimi i Serbisë, por edhe nga Kosova është ulur.

Rudari ndodhet rreth 20 kilometra nga vendkalimi administrativ Merdar drejt Kurshumlisë.

Rruga që nga mbrëmë është bllokuar nga serbët vendas të Kurshumlisë, për kamionët me targa të Kosovës “RKS”, si masë reciproke ndaj asaj me të cilën qeveria e Kosovës para disa ditësh ndaloi hyrjen në Kosovë të mallrave dhe kamionëve serbë me targa të Republikës së Serbisë.

Sipas organizatorëve të bllokadës, kamionët dhe autobusët me targa të Kosovës dhe të huaja ende nuk lejohen të kalojnë. Ata shtojnë se gjatë natës ka pasur shumë tentativa për të kaluar, por të gjithë janë kthyer. Makinat e pasagjerëve kalojnë normalisht dhe nuk preken nga bllokada.

Siç raporton reporteri i Kosovo online nga Merdari nga drejtimi i Serbisë, në atë vendkalim administrativ kalojnë një numër i vogël i automjeteve.

Kamionët e transportuesve nga Shqipëria, pasi kanë pritur për disa orë para vendkalimit, janë kthyer në Shqipëri. Ndërsa, automjetet me targa të Kosovës kalojnë lirshëm, por me intensitet dukshëm më të ulët se zakonisht.

Gjithashtu, disa kamionë me targa malazeze kanë kaluar në Serbi nga Kosova.