Pashkët në Leposaviq: Veza më e bukur e pikturuar me figurën e Krishtit, më e forta erdhi nga Beogradi

Në Kishën e Shën Vasilit të Ostrogut në Leposaviq, në praninë e një numri të madh besimtarësh, u festua festa më e gëzueshme e krishterë – Pashkët. Liturgjinë e shenjtë e shërbyen priftërinjtë vendas, ndërsa u lexua edhe mesazhi i patriarkut serb Porfirije.

Pas liturgjisë pasoi kungimi dhe shpërndarja e naforës.

Oborri i kishës u mbush me shumë fëmijë, të cilët me gëzim prisnin garën tradicionale për vezën më të bukur dhe më të fortë të Pashkëve.

Fituesit e këtij viti janë Vanja Radovanoviq, e cila fitoi çmimin për vezën më të bukur, dhe Lluka Marjanoviq, veza e të cilit u shpall më e forta.

Fituesit, si dhe ata që zunë vendin e dytë dhe të tretë, u shpërblyen me trofe, ikona dhe dhurata të tjera simbolike.

Vanja e pikturoi Krishtin, sipas idesë së nënës së saj.

“Kam marrë pjesë në këtë garë prej disa vitesh, por kjo është hera e parë që fitoj çmim. Idetë për vizatimin i mora nga nëna ime, e cila ishte frymëzimi im. Në vezë vizatova Jezu Krishtin, sepse ai është thelbi i Pashkëve. Nuk më mori shumë kohë vizatimi, por kërkoi shumë përkushtim dhe kujdes. Fillimisht bëra një skicë, pastaj me një furçë të hollë e ngjyrosa me tempera”, shpjegoi ajo.

Lluka Marjanoviq erdhi nga Beogradi, dhe fakti që kishte vezën më të fortë ia zbukuroi edhe më shumë festën.

“Kam ardhur nga Beogradi te gjyshja në Leposaviq. Nuk e prisja fitoren, por jam shumë i lumtur që fitova”, tha Lluka.

Protojereu Dragan Gjukiq u uroi besimtarëve Pashkët.

“Krishti u ngjall! Sot është një ngjarje e madhe në oborrin e kishës sonë, sepse besimtarët me fëmijët u përgatitën për këtë festë për shtatë javë përmes agjërimit. Edhe fëmijët agjëruan, kështu që gëzimi këtë mëngjes ishte i jashtëzakonshëm, sepse të gjithë u kunguan. Pas kësaj, tradicionalisht u organizua gara për vezën më të bukur dhe më të fortë, gjë që i gëzoi edhe më shumë më të vegjlit. Tani të gjithë po kthehen në shtëpitë dhe familjet e tyre për ta festuar me gëzim festën më të madhe të krishterë”, tha Gjukiq.