Radosavleviq: Në postbllokun e Bistricës kam përjetuar shqetësime edhe më parë, prandaj edhe kam filmuar

Drejtoresha e organizatës “Nisma e Re Shoqërore”, Jovana Radosavljeviq, pas deklaratës në stacionin policor në Zveçan, ka thënë se e ka ndezur kamerën e telefonit kur ka kaluar Urën e Bistricës për sigurinë e saj, duke deklaruar se paraprakisht kishte përjetuar shqetësime në postbllokun e Policisë së Kosovës që ndodhet në atë urë.

“Sot policia e rregullt më ndaloi te ura e Bistricës, gjegjësisht postblloku për qëllime kontrolli, por edhe më ndaluan mbi një orë, po në atë vend, sepse më ishte ndezur kamera. Arsyeja që e bëj sa herë që kaloj në pikën e Bistricës është shqetësimi që kam përjetuar në periudhën e kaluar nga njësia speciale e Policisë së Kosovës, kështu që ndihem më e sigurt nëse e filmoj kalimin tim”, ka theksuar ajo.

Më tej ajo ka treguar se polici e ka pyetur pse e bën këtë dhe i ka kërkuar që ta fikë telefonin, gjë që ajo ka refuzuar. Pas gjysmë ore erdhën policët me rroba civile dhe i kërkuan që të parkonte mjetin dhe të dilte prej tij.

“Më dhanë të dhëna të rreme, më kërkuan të dorëzoja telefonin edhe pse nuk kishin vendim gjykate, të cilën ua thashë. Ata pretenduan se mund ta merrnin telefonin tim pa të. Sigurisht që kam refuzuar dhe më duhet të përmend se nuk kanë treguar identifikim, kështu që nuk e di se cilët oficerë ishin të përfshirë. Pasi prita, më thanë të ndiqja automjetin e policisë deri në stacionin në Zveçan, ku dhashë deklaratën time”, thotë Radosavleviq.

Ajo tregon se dhënia e deklaratës ka shkuar më mirë se ngjarjet në Urën e Bistricës dhe se i është thënë se nuk ka nevojë për avokat, sepse nuk është vepër penale por kundërvajtje.

“Kjo është shumë shqetësuese, edhe pse ka shenjë për xhirime të ndaluara, bëhet fjalë për një objekt që ndodhet në një sipërfaqe publike, ku kur kaloj, të panumërta jam gjendur tashmë në një situatë që nuk jam rehat, sidomos kur jam vetëm në makinë ose në mbrëmje”, thotë Radosavleviq.

Siç tha ajo, represioni dhe sjellja e Policisë së Kosovës është diçka për të cilën theksojnë aktivistët e shoqërisë civile dhe qytetarët.

“Ka një problem të madh me trajtimin e banorëve nga veriu, në radhë të parë për shkak se ata nuk e flasin gjuhën e komunitetit lokal, nuk japin informacion adekuat dhe vetë qytetarët nuk i dinë të drejtat e tyre, kështu që ata shpesh e abuzojnë, gjë që thuajse ndodhi në rastin tim, kur më kërkuan t'u dorëzoja telefonin. Shtrohet pyetja për ekzistimin e një postblloku në Bistricë dhe xhirimet e ndaluara, sepse dje kemi pasur ekipe mediatike që kanë qenë me ministrin e Punëve të Brendshme në të njëjtin vend dhe sot më kanë ndaluar për të njëjtën arsye”, tha Radosavleviq.