Studentët me bluza me mbishkrimin “Dil vogëlushe” përkrahën protestën në Zveçan

Studentët e Universitetit të Prishtinës me seli të përkohshme në Mitrovicën e Kosovës erdhën sot në Zveçan të veshur me bluza në të cilat shkruhej “Dil vogëlushe”, për t'i mbështetur njerëzit që 11 ditë po protestojnë para ndërtesës së komunës.

Bluzat kanë një ilustrim të një pjesëtari të Policisë Speciale të Kosovës në dritare dhe poshtë saj mbishkrimin “Dil vogëlushe”.

Kryetarja e Konferencës Studentore të Universiteteve të Serbisë (SKONUS), Margareta Smilaniq, foli në emër të të gjithë studentëve dhe tha se ata janë këtu për të mbështetur njerëzit që duan të ruajnë shtëpitë dhe lirinë e tyre.

“Situata në të cilën jemi dëshmitarë çdo ditë kërkon bashkimin tonë, përgjegjësinë, por edhe mbështetjen që u duhet bashkëqytetarëve tanë në Mitrovicë e Kosovës dhe në veri të Kosovës e Metohisë. Mendoj se këta të rinj që na rrethojnë na tregojnë një mësim të mirë për të gjithë ne, si të luftosh për mbijetesën tënde dhe të popullit tënd. Ne të gjithë kemi nevojë për një shtëpi për të jetuar, por vetëm një familje mbështetëse krijon një shtëpi. Dua t'ju them sot se studentët janë këtu dhe ju mbështesin për të mbrojtur shtëpinë tuaj, për të qëndruar në shtëpitë tuaja dhe ne jemi gjithmonë këtu për ju”, tha Smilaniq.

Doktorantja Sara Jekiq recitoi këngën e Aleksa Shantiqit “Qëndroni këtu”, ndërsa në fund të performancës studentët u mblodhën para kordonit të KFOR-it dhe kënduan këngën “Dil vogëlushe”, e cila u bë himni jozyrtar i protestës dhe që ishte dëgjuar edhe në ditët e mëparshme.

Në këtë mënyrë studentët u kanë dërguar mesazh kryetarëve të komunave dhe forcave speciale të Policisë së Kosovës, të cilët prej 11 ditësh po bllokojnë komunën, që të largohen nga ky institucion.