Petkoviq: Asgjë nuk ka mbaruar, Lista Serbe do të luftojë dhe do të fitojë

Drejtori i Zyrës për Kosovë dhe Metohi, Petar Petkoviq, ka deklaruar se Komisioni Qendror i Zgjedhjeve i Kosovës mbrëmjen e sotme nuk e ka certifikuar Listën Serbe për pjesëmarrje në zgjedhjet lokale më 12 tetor, sipas urdhrit të drejtpërdrejtë të Albin Kurtit.

Petkoviq theksoi se goditja e Kurtit ndaj Listës Serbe është në fakt një goditje ndaj gjithë popullit serb në Kosovë.

Megjithatë, ai u shpreh se asgjë nuk ka mbaruar dhe se Lista Serbe do të “luftojë dhe do të fitojë”.

“Sipas urdhrit të drejtpërdrejtë të Kurtit, KQZ-ja mbrëmjen e sotme e hodhi poshtë pjesëmarrjen e Listës Serbe në zgjedhjet lokale. E njëjta tentativë për shuarjen e Listës Serbe, si në dhjetor të vitit të kaluar. Goditja e Kurtit ndaj Listës Serbe është edhe goditje ndaj gjithë popullit serb në Kosovë. Prandaj nuk ka dyshim për kë votojnë serbët. Asgjë nuk ka mbaruar, Lista Serbe do të luftojë dhe do të fitojë”, shkroi Petkoviq në rrjetin social “X”.

Komisioni Qendror i Zgjedhjeve mbrëmjen e sotme, me dy vota për, dy kundër dhe shtatë abstenime, e refuzoi propozimin për certifikimin e Listës Serbe për pjesëmarrje në zgjedhjet lokale të tetorit.