Petkoviq: Prishtina është nervoze për shkak të pjesëmarrjes së madhe në zonat serbe

Drejtori i Zyrës për Kosovë dhe Metohi, Petar Petkoviq, deklaroi se pjesëmarrja e madhe në zonat serbe në Kosovë po shkakton nervozë në Prishtinë, prandaj edhe në ditën e zgjedhjeve Vjosa Osmani po e përdor për të sulmuar Listën Serbe.

“Pjesëmarrja e madhe në zonat serbe në KdheM që nga mëngjesi është pamja më e fortë e unitetit serb! Komunat serbe në duar serbe! Për këtë arsye ka nervozë të madhe në Prishtinë. Edhe në ditën e zgjedhjeve, Vjosa po e përdor për të sulmuar Listën Serbe, sepse edhe ajo e di se sot më në fund do t’i shohim shpinën gauleiterëve të Kurtit!”, shkroi Petkoviq në rrjetin social “X”.

Ai shtoi se sulmet ndaj Listës Serbe për shkak të pjesëmarrjes së madhe të serbëve do të çojnë në pjesëmarrje edhe më të lartë.

“Fitorja e Listës Serbe është vendimtare për mbijetesën e serbëve në KdheM! Prandaj është e rëndësishme që sa më shumë njerëz tanë të dalin sot në zgjedhje. Deri në fitoren përfundimtare!”, përfundoi Petkoviq.