Qeveria gjermane: Qytetarët e Kosovës morën vitin e kaluar më së shumti miratime për punësim dhe viza sipas “Rregullores për Ballkanin Perëndimor”

Zëdhënësja e Ministrisë gjermane të Punës dhe Çështjeve Sociale (BMAS) deklaroi për Kosovo online se vitin e kaluar Agjencia Federale e Punës dha miratime paraprake për punësimin e 11.980 qytetarëve të Kosovës sipas “Rregullores për Ballkanin Perëndimor”, ndërsa për qytetarët e Serbisë u lëshuan 9.253 miratime. Nga BMAS bëjnë të ditur se kuota, nga 1 janari 2027, do të ulet nga 50.000 në 25.000 në vit dhe se punëtorët nga rajoni nuk do të orientohen drejt profesioneve apo sektorëve të caktuar.

Zëdhënësja e BMAS-it theksoi se ulja e kuotës ishte dakorduar tashmë në marrëveshjen e koalicionit qeverisës gjerman, ndërsa Komiteti i Koalicionit gjatë verës kishte rënë dakord që kjo masë të zbatohej nga fillimi i vitit 2027.

Siç thekson, brenda Qeverisë gjermane aktualisht po zhvillohen konsultime për harmonizimin e qëndrimeve lidhur me zbatimin e kësaj mase.

Sipas të dhënave të BMAS-it, gjatë vitit 2025, numrin më të madh të miratimeve paraprake në kuadër të “Rregullores për Ballkanin Perëndimor” e morën qytetarët e Kosovës – 11.980. Pas tyre renditen qytetarët e Shqipërisë me 10.345 miratime paraprake, të Maqedonisë së Veriut me 9.917 dhe të Serbisë me 9.253. Qytetarëve të Bosnjës dhe Hercegovinës iu lëshuan 7.525 miratime paraprake, ndërsa atyre të Malit të Zi 980.

Numri i përgjithshëm i miratimeve të lëshuara ishte, pra, saktësisht 49.000, ndërsa zëdhënësja e Ministrisë gjermane të Punës dhe Çështjeve Sociale theksoi se bëhet fjalë për miratime paraprake të Agjencisë Federale të Punës dhe jo për numrin përfundimtar të vizave të lëshuara.

Në përgjigjen e Ministrisë së Jashtme gjermane ndaj pyetjes së Kosovo online thuhet se gjatë vitit 2025, në kuadër të “Rregullores për Ballkanin Perëndimor”, janë shqyrtuar gjithsej 33.731 kërkesa për viza.

Nga ministria bëjnë të ditur se prej tyre, 7.279 ishin kërkesa të qytetarëve të Kosovës, 6.929 të shtetasve të Maqedonisë së Veriut, 6.893 të shtetasve të Shqipërisë, 6.161 të shtetasve të Bosnjës dhe Hercegovinës, 5.837 të shtetasve të Serbisë dhe 632 të shtetasve të Malit të Zi.

Në pyetjen nëse ulja e kuotës do të ketë pasoja për sektorët ku tashmë ka mungesë të fuqisë punëtore dhe nëse punëtorët nga Serbia dhe vendet e tjera të rajonit do të orientohen në të ardhmen më shumë drejt profesioneve deficitare, nga BMAS-i përgjigjen se Qeveria gjermane nuk i orienton punëtorët nga vendet e Ballkanit Perëndimor drejt profesioneve apo sektorëve të caktuar.

Megjithatë, ndër punët që punëtorët nga rajoni kryejnë aktualisht më së shpeshti në Gjermani janë ato në shërbimet postare, të korrierëve dhe të dërgesave ekspres, në hoteleri dhe gastronomi, si dhe në ndërtimtari, theksoi zëdhënësja e BMAS-it.

Sipas saj, ulja e kuotës do ta kufizojë këtë mënyrë të veçantë të qasjes në tregun gjerman të punës, por ekzistojnë edhe mundësi të tjera për ardhjen e punëtorëve nga vendet e treta.

“Ekzistojnë mundësi të ndryshme të tjera për imigrimin e punëtorëve të kualifikuar dhe punëtorëve të tjerë”, theksoi zëdhënësja e BMAS-it, duke përmendur, ndër të tjera, mundësinë e punësimit afatshkurtër me kuota të përcaktuara, si dhe rregulloret e veçanta për punëtorët e kualifikuar me arsim profesional ose universitar të njohur.

Gjermania gjithashtu ofron mundësi të veçanta për kategori të caktuara punëtorësh, përfshirë kujdestarët dhe shoferët profesionistë, ndërsa për punëtorët e kualifikuar me përvojë në profesione të caktuara të parregulluara zbatohen rregulla të veçanta.

Sa u përket përvojave të punëtorëve nga Ballkani Perëndimor që kanë ardhur në Gjermani gjatë viteve të mëparshme, BMAS-i bën të ditur se nuk mbledh të dhëna për këtë, por thekson se “Rregullorja për Ballkanin Perëndimor” është shfrytëzuar gjerësisht që nga hyrja e saj në fuqi.

Ministria shton se kushtet e punësimit të punëtorëve që kanë siguruar punë në bazë të kësaj rregulloreje janë të njëjta me ato të punonjësve vendas në pozita të krahasueshme, në përputhje me Ligjin gjerman për Qëndrimin.

“Rregullorja për Ballkanin Perëndimor” u mundëson shtetasve të Serbisë, Kosovës, Shqipërisë, Bosnjës dhe Hercegovinës, Malit të Zi dhe Maqedonisë së Veriut që, nën kushte të caktuara, të shkojnë në Gjermani për t'u punësuar, pavarësisht kualifikimit të tyre formal. Rregullorja u zgjerua në vitin 2023, kur kuota vjetore u rrit nga 25.000 në 50.000 persona.