Ambasada e Gjermanisë: Shqetësim për ndryshimin e Ligjit për Dhomat e Specializuara

Ambasada e Gjermanisë në Prishtinë njoftoi se është „thellësisht e shqetësuar“ për ndryshimet e Ligjit për Dhomat e Specializuara, duke shtuar se bëhet fjalë për një institucion gjyqësor, pavarësia e të cilit nuk duhet të cenohet.

„Dhomat e Specializuara janë një institucion gjyqësor i pavarur, i themeluar sipas ligjeve të Kosovës dhe i mbështetur në Kushtetutën e Kosovës. Qëllimi i tyre është të sigurojnë llogaridhënie dhe drejtësi për viktimat nga të gjitha komunitetet në Kosovë. Për realizimin e këtij qëllimi, pavarësia e tyre duhet të respektohet plotësisht“, thuhet në përgjigjen për Radion Evropa e Lirë.

Ambasada theksoi se mbështet qëndrimin e BE-së lidhur me ndryshimet e këtij ligji.

„I bëjmë thirrje Kosovës që t’u përmbahet detyrimeve të saj ndërkombëtare për garantimin e pavarësisë gjyqësore të Dhomave të Specializuara të Kosovës, si dhe detyrimit për të siguruar llogaridhënie dhe për t’u ofruar drejtësi viktimave dhe familjeve të tyre nga të gjitha komunitetet në Kosovë“, u tha për Kosovo online.

Nga Qeveria e Kosovës ende nuk ka pasur komente lidhur me shqetësimet e aktorëve ndërkombëtarë për ndryshimet e ligjit, ndërsa zyrtari i PDK-së opozitare, Përparim Gruda, theksoi se Kosova nuk po i shkel detyrimet e saj ndërkombëtare.

Ndryshimet e miratuara e ngushtojnë juridiksionin e Dhomave të Specializuara sa u përket veprave penale, periudhës kohore dhe territorit, e kufizojnë dënimin me burg në 15 vjet dhe parashikojnë transferimin e lëndëve, përkatësisht vuajtjen e dënimeve në Kosovë.