Gashi: Dëshmia e Clarkut do të kontribuojë në zbulimin e së vërtetës, ai është dëshmitar shumë i rëndësishëm i mbrojtjes së Hashim Thaçit

Wesley Clark do të jetë dëshmitari i fundit i mbrojtjes në rastin kundër Hashim Thaçit dhe të tjerëve para Dhomave të Specializuara të Kosovës, ndërsa avokati Tom Gashi vlerëson se dëshmia e tij do të ndihmojë në, siç thotë ai, zbulimin e së vërtetës.

“Të gjithë e dimë që Wesley Clark ishte gjenerali që bombardoi Serbinë gjatë vitit 1999, për shkak të krimeve të luftës të kryera në Kosovë. Besoj se ai është një nga dëshmitarët më të rëndësishëm të mbrojtjes së Hashim Thaçit dhe të tjerëve që po gjykohen në Gjykatën Speciale. Mendoj se ai do t’i ndihmojë gjykatës që të përcaktojë të vërtetën lidhur me këtë aktakuzë që është ngritur para më shumë se pesë vitesh”, thotë Gashi.

Ai theksoi se Clark ishte komandanti kryesor i NATO-s gjatë bombardimeve të Serbisë dhe për këtë arsye është një dëshmitar shumë i besueshëm.

“Për këtë arsye ai është në fakt një nga dëshmitarët që është propozuar në këtë gjykatë speciale nga ana e mbrojtjes”, thotë Gashi.