Abazoviq: Miqësisht me Vuçiqin, Gjukanoviq dëshiron marrëdhënie këqija me Serbinë dhe kjo nuk është mirë për Malin e Zi

Kryeministri malazez Dritan Abazoviq tha në një intervistë për “Vijesti” të Podgoricës se i konsideron joserioze vlerësimet, të cilat i interpreton si sulme, se presidenti serb po menaxhon diçka në Mal të Zi, duke shtuar se marrëdhënia e tij me Alleksandar Vuçiqin është korrekte dhe miqësore, transmeton Nova.

Abazoviq thotë se Mali i Zi është një shtet sovran që synon të bëhet anëtar i BE-së, por është edhe një demokraci parlamentare.

“Parlamenti ynë funksionon me kapacitet të plotë. Dikush mund të thotë këtë apo atë për qeverinë. Parlamenti me këtë përbërjen që ka, e pëlqente dikush apo jo, funksionon me kapacitet të plotë. Ne nuk jemi sistem presidencial, tek ne funksioni i presidentit është protokollar, për shkak të rrethanave politike kemi ardhur në një situatë që dikush nuk dëshiron t'i japë mandat dikujt, është vështirë se kjo do të përsëritet në të ardhmen. Kjo është një situatë specifike, do të kemi presidentë të tjerë, por nuk do të kemi atë lloj lufte sepse Mali i Zi po maturon”, ka thënë Abazoviq për “Vijesti”.

Sipas tij, vazhdimisht sulmohet se Alleksandar Vuçiq po menaxhon diçka në Mal të Zi, Abazoviq i hedh poshtë këto gjëra.

"E konsideroj joserioz. Marrëdhënia ime me Vuçiqin është shumë korrekte, miqësore. Marrëdhënia ime me njerëzit e tjerë në rajon është e njëjtë. Me disa shumë miqësore, me të tjerët korrekte, por me asnjë kryeministër apo president në rajon nuk ka ndërprerje në komunikim. Mendoj se është detyrë e Kryeministrit të Malit të Zi, kushdo qoftë ai, të mbajë marrëdhënie të mira me njerëzit në rajon. A na pëlqen një opsion politik në rajon, kjo nuk është çështja jonë dhe nuk është çështje për qytetarët tanë. Ne kemi pushtet sovran, i respektojmë të tjerët në të njëjtën mënyrë dhe kaq. Gjithë kjo bisedë për Vuçiqin mendoj se është në kontekstin e krijimit të një narrativë politike negative në raport me mua personalisht. Më vjen mirë që me të, me kryeministrat e Shqipërisë, të Kosovës dhe me Kryetarin e Këshillit të Bosnjës e Hercegovinës, kemi marrëdhënie që duhet t'i ketë çdo kryeministër i Malit të Zi”, tha Abazoviq.

Ai shton se ndikimi i Vuçiqit në Mal të Zi është i mbivlerësuar.

“Dhe mendoj se me një marrëdhënie të tillë për të krijojmë një ambient më të favorshëm për atë që po flisni. Dua të jem korrekt, mendoj se duhet të flasim faktikisht, dhe jo për atë që është perceptimi ynë. Kur bëhet fjalë për skenën mediatike, problemi janë ligjet tona, rregulloret tona për media. Nëse dikush dëshiron të thotë se duhet të kemi marrëdhënie të këqija me Republikën e Serbisë, vetëm pse i shkon për shtat Millo Gjukanoviqit, nuk e pranoj këtë si një gjë të mirë për Malin e Zi. Nëse do të ndërtojmë mure, të jemi në konflikt të vazhdueshëm dhe të kemi frikë nga njëri-tjetri, ky është një koncept. Nëse do të zhvillojmë bashkëpunim, të kemi marrëdhënie liberale, të bëjmë projekte të përbashkëta infrastrukturore dhe të lidhemi, unë personalisht zgjedh këtë të fundit. Është një marrëdhënie që nuk ka të bëjë me dikë që është personalisht në pushtet. Mendoj se perceptimi i ndikimit të Vuçiqit në Mal të Zi është vërtet i mbivlerësuar”, theksoi Abazoviq.

Abazoviq ka komentuar edhe pretendimin se komunikimi i tij me publikun i ngjan atij të Vuçiqit.

“Përgjigja më e lehtë është se nuk ka të bëjë me trurin, sepse sipas mendimit tim modest, strategjia e tij është e shkëlqyer dhe ne jemi shumë larg nga diçka që do të ishte një strategji e shkëlqyer. Kjo është përgjigja ime me një tonë shaka”, tha Kryeministri malazez.