Ambasada gjermane Petkoviqit: Fillimisht pastroni para pragut të shtëpisë suaj

Ambasada e Gjermanisë në Prishtinë ka reaguar me një deklaratë duke bërë të ditur se ka marrë në dijeni letrën e fundit të drejtorit të Zyrës për Kosovë dhe Metohi Petar Petkoviq, në të cilën ai i bën thirrje Bashkimit Evropian, vendeve anëtare dhe palëve të tjera të interesuara që të ndalin veprimet përshkallëzuese të Prishtinës dhe ndërtimin e planifikuar të dy urave të reja mbi lumin Ibër.

Siç theksohet më tej në deklaratë "Ambasada e Gjermanisë në mënyrë të qëndrueshme ka theksuar në përgjigjet për media se i bën thirrje Qeverisë së Kosovës të përmbahet nga veprimet përshkallëzuese, por gjithashtu që thirrjet për deeskalim duhet të vlejnë në mënyrë të barabartë për të gjitha palët.

“Me siguri nuk është Qeveria e Kosovës ajo që nuk po zbaton masa ligjore kundër përgjegjësve për sulmin e tmerrshëm në Banjskë. Fakti që udhëheqësi i vetëshpallur i atij sulmi, serbi nga Kosova dhe ish-nënkryetar i Listës Serbe, zoti Radoiçiq, publikisht e ka pranuar përgjegjësinë, e megjithatë lëviz lirshëm në territorin e Serbisë, thellësisht minon përpjekjet për ndërtimin e besimit dhe përgjegjësisë në rajon," thuhet në deklaratë.

Në deklaratën e Ambasadës, ata thonë se një burrë duhet ta rregullojë shtëpinë e tij përpara se ta fajësojë vazhdimisht Kosovën për vendimet e saj.

"Në gjermanisht themi - 'Erstmal vor der eigenen Haustür kehren' - së pari pastroni para pragut të shtëpisë suaj. Duke u transferuar në situatën aktuale, kjo proverb na kujton se një burrë duhet ta rregullojë shtëpinë e tij përpara se ta fajësojë vazhdimisht Kosovën për vendimet e saj. Mosveprimi në ndjekjen penale të autorëve të dhunshëm është po aq i mjerueshëm dhe kundërproduktiv sa të gjitha masat e pakoordinuara të Prishtines", thuhet në fund të deklaratës.