Baraliu: Qasja ndaj dialogut me BE-në duhet të ndryshojë, sepse qasja aktuale nuk ka dhënë rezultate 

Analisti politik Mazllum Baraliu, në lidhje me takimin e djeshëm të negociatorëve kryesorë të Beogradit dhe Prishtinës në Bruksel, thotë se dialogu ka ngecur dhe se BE-ja duhet të ndryshojë qasjen, sepse qasja aktuale nuk ka dhënë asnjë rezultat.

Baraliu për Kosovo online thekson se është mirë kur mbahen takime dhe zhvillohen bisedime, por vlerëson se dialogu ka ngecur.

„Dialogu për momentin ka ngecur, nuk ka dialog dhe nuk mund të ketë me këtë politikë të BE-së, që do të thotë se nuk mund të ketë vazhdim të politikës së Xhosep Borellit dhe Mirosllav Lajçakut, sepse ajo nuk ka pasur sukses. Gjithçka që ata kanë bërë gjatë mandatit katërvjeçar ka mbetur në vendnumëro, madje edhe marrëveshjet dhe pajtimet, përpjekja e Francës dhe Gjermanisë jashtë institucioneve të BE-së, gjë që nuk është e zakonshme, nuk është dëshmuar si një iniciativë e suksesshme, as marrëveshja në Bruksel e as aneksi në Ohër”, thotë Baraliu.

Ai shton se nuk ka përparim që do të duhej të reflektohej në përmirësimin e marrëdhënieve mes qytetarëve të Kosovës dhe Serbisë, veçanërisht sa i përket çështjes së të zhdukurve.

„Ka pasur marrëveshje katër vite më parë, në nivel të lartë, mes presidentit të Serbisë dhe kryeministrit të Kosovës, Aleksandar Vuçiq dhe Albin Kurti, që kësaj çështjeje t’i jepet prioritet, mirëpo nuk është bërë asgjë. Për këtë arsye mendoj se dialogu në këtë formë, i udhëhequr nga Peter Sorensen, nuk do të ecë përpara. Mendoj se dialogun duhet ta përgatisë zonja Kaja Kallas, me negociatorë në nivelin më të lartë dhe që ai të reformohet, në mënyrë që të hartohet një rend dite për mënyrën se si do të fillohet dhe cilat do të jenë hapat e ardhshëm”, ka shtuar Baraliu.

Ai theksoi se institucionet e reja në BE thjesht vazhduan aty ku u ndalën ato të mëparshmet.

"Sigurisht, dialogu është i nevojshëm, por mbi të gjitha, mënyra e lidershipit dhe vetë modeli duhet të ndryshohen, sepse mënyra se si filluan institucionet e reja të BE-së nuk do të funksionojë, ato thjesht vazhduan aty ku u ndalën paraardhësit e tyre, dhe kjo nuk ishte rasti as në katër vitet e mëparshme. Pra, as njëra dhe as pala tjetër nuk pranuan të shkonin më tej. Mendoj se metoda e qasjes dhe thelbi i sekuencës dhe strukturës së dialogut duhet të ndryshohen", përfundoi Braliu.