Novakoviq: Në dialog fokusi në tema më pak problematike, por edhe aty është e diskutueshme nëse është i mundur ndonjë përparim

Bashkëpunëtori i lartë i Qendrës për Çështje Ndërkombëtare dhe të Sigurisë, Igor Novakoviq, deklaroi për Kosovo online se në dialogun ndërmjet Beogradit dhe Prishtinës, në kuadër të të cilit dje u mbajt një raund me ndërmjetësimin e përfaqësuesit të ri të BE-së, Peter Sorensen, fokusi është vendosur qartazi në çështje që në aspektin politik nuk janë aq problematike, por mbetet e paqartë nëse edhe në to është i mundur ndonjë përparim, edhe pse Sorensen ka ambicie që të arrijë ndonjë rezultat.

Këto tema janë, sipas tij, çështja e personave të zhdukur dhe menaxhimi i integruar i vendkalimeve.

„Atje ndoshta Bashkimi Evropian, gjegjësisht z. Sorensen, dëshiron të arrijë ndonjë rezultat. Meqë është paralajmëruar që takimi i radhës do të mbahet në Gjenevë, është shumë e mundur që tema në të cilën ai është aktualisht i fokusuar është çështja e personave të zhdukur. Por, duke marrë parasysh sa i ngadalshëm ka qenë përparimi në këtë çështje gjatë viteve të kaluara, sinqerisht dyshoj që do të arrihet ndonjë rezultat i madh, përveç nëse të dyja palët dëshirojnë të lënë ndonjë përshtypje te përfaqësuesi i posaçëm i BE-së për dialog, z. Sorensen, dhe jo të marrin pjesë vetëm sa për të qenë të pranishëm në zyrë, pa asnjë rezultat të vërtetë“, tha Novakoviq.