Beteja për statutin e BKS-së ruan të drejtat e serbëve

Ekipi Menaxhues i përbërë nga përfaqësues të komunave serbe nga Kosova, në raundin e ardhshëm të dialogut të nivelit të lartë ndërmjet Beogradit dhe Prishtinës, duhet të prezantojë draftin e Statutit të Bashkësisë së Komunave Serbe. Teksti ka përfunduar në vitin 2018 dhe Ekipi Menaxhues ka marrë mandatin për të filluar me shkrimin e Statutit nga BE-ja, bazuar në marrëveshjen e arritur në vitin 2013 dhe 2015 në kuadër të dialogut ndërmjet Beogradit dhe Prishtinës, por tani do të ketë një “premierë” për publikun, shkruan Novosti.

Ky orar u konfirmua edhe një herë në raundin teknik të dialogut dy ditë më parë gjatë bisedës së Drejtorit të Zyrës për Kosovë e Metohi, Petar Petkoviq dhe përfaqësuesit të Prishtinës, Besnik Bislimi.
Sipas Novosti-t, të dyja palët më pas pritet të paraqesin qëndrimet e tyre për draft Statutin në dialog. Meqë ra fjala, për herë të parë Prishtina pranoi të diskutojë hapat konkretë për formimin e BKS-së.

Të gjitha pikat e marrëveshjes janë përkthyer në tekstin e Ekipit Menaxhues, i cili parasheh që BKS të përbëhet nga komuna me shumicë serbe, që të ketë një kryetar, një statut, një kuvend, një këshill dhe një bord, një administratë dhe një zyrë apeli, dhe se qëllimet kryesore dhe kompetencat e saj kryesore janë forcimi i demokracisë lokale, mbikëqyrja e plotë për zhvillimin e ekonomisë lokale, në fushën e arsimit, përmirësimi i kujdesit shëndetësor parësor dhe dytësore dhe social, koordinimi i planifikimit urban dhe rural, miratimi i masave për përmirësimin e kushteve lokale të jetesës së të kthyerve në Kosovë.

Bashkësia do të punojë me autoritetet qendrore në përputhje me parimin e bashkëpunimit të ndërsjellë dhe shkëmbimit të informacionit, do të promovojë interesat e komunitetit serb, ka të drejtë të propozojë ndryshime në ligje dhe rregullore të tjera, të inicojë ose të marrë pjesë në procedurat para gjykatat kompetente, përfshirë edhe para Gjykatës Kushtetuese dhe kundër të gjitha akteve apo vendimeve të çdo institucioni që cenon ushtrimin e juridiksionit të BKS-së – kjo është pjesë e marrëveshjes për BKS-në.

BKS duhet të ketë të drejtën e pronës, të jetë bashkëpronar i kompanive që ofrojnë shërbime lokale në kuadër të fushëveprimit të BKS-së, të lidhë kontrata, përfshirë ato për punë.
Sipas marrëveshjes, BKS mund të shpërndahet vetëm me vendim të Kuvendit të saj, i cili është miratuar me shumicë prej dy të tretave të komunave anëtare. Ajo ka të drejtë në simbolet e saj zyrtare, stemën dhe flamurin, në përputhje me ligjet e Kosovës.

Në takimin në nivel teknik, sipas njohurive të Novosti-t, është rënë dakord edhe për termin që do të përdoret në Deklaratën për Personat e Pagjetur. Bëhet fjalë për “të zhdukur me forcë”.
"Kjo është e rëndësishme për shkak të familjeve të të gjithë atyre që janë ende të zhdukur. Unë do të shtoja se ne u kujdesëm veçanërisht për të gjitha terminet dhe nuk e pranuam termin "zhdukje me dhunë", sepse u kujdesëm që të mos rrezikojmë interesat e shteti i Serbisë”, tha Drejtori i Zyrës për Kosovë e Metohi, Petar Petkoviq.

Termi “zhdukje me dhunë” është në konventën ndërkombëtare dhe në bazë të tij, nëse do të kishte kaluar, barra e të gjitha zhdukjeve në Kosovë do t'i vihej Serbisë, që shteti i Serbisë e pa dhe e pengoi.
Para nga Beogradi

Në pjesën që ka të bëjë me buxhetin, parashikohet që BKS të ketë thesarin e saj, që do të financohet nëpërmjet kontributeve të anëtarëve, të ardhurave dhe fondeve nga shërbimet e ofruara nga BKS, shoqëritë e saj ose nga pronat, transfertat e fondeve nga autoritetet qendrore, kontributet, kreditë e pakthyeshme dhe donacionet si dhe përmes mbështetjes financiare nga shoqata dhe organizata të tjera, vendase dhe ndërkombëtare, si dhe nga Republika e Serbisë. BKS është i përjashtuar nga pagesa e taksave.