Stano: Teksti i dakorduar i Deklaratës për Personat e Zhdukur, hapi i parë i Marrëveshjes

Kryenegociatorët e Kosovës dhe Serbisë, Besnik Bislimi dhe Petar Petkoviq, janë pajtuar për tekstin e Deklaratës për Personat e Zhdukur, ka konfirmuar për N1 zëdhënësi i Shërbimit të Jashtëm të BE-së, Petar Stano, duke theksuar se është “hapi i parë në përputhje me Aneksin e Marrëveshjes për rrugën drejt normalizimit të marrëdhënieve ndërmjet dy palëve”, për të cilin paraprakisht është rënë dakord në takimin e nivelit më të lartë më 18 mars në Ohër.

Stano shtoi se Deklarata do të mbështetet zyrtarisht nga liderët e dy partive, Aleksandar Vuçiq dhe Albin Kurti, në takimin e radhës, data e së cilës ende nuk është përcaktuar.

Ai tha se në takimin e djeshëm, i pari pas takimit Vuçiq-Kurti në Ohër, negociatorët kryesorë kanë diskutuar për zbatimin e të gjitha dispozitave të Marrëveshjes dhe aneksit të saj, si dhe për çështje urgjente, aktuale, ndër të cilat janë energjia dhe targat.

“Është e qartë se është e nevojshme të diskutohen më tej të gjitha çështjet e rendit të ditës për të arritur progres, dhe palët ranë dakord që të takohen sërish së shpejti”, ka thënë Stano, pa specifikuar se kur duhet të mbahet ai takim.

Stano përsëriti se BE pret që edhe Kosova edhe Serbia të përmbushin të gjitha detyrimet e tyre që dalin nga Marrëveshja dhe Aneksi i arritur në Ohër dhe të fillojnë zbatimin e tyre pa vonesë.

“Të gjitha palët duhet të shmangin çdo retorikë kundërproduktive, d.m.th., jo konstruktive dhe aktivitete që kanë potencialin të pengojnë zbatimin (e marrëveshjes) dhe të kërcënojnë stabilitetin në terren”, tha zëdhënësi i Shërbimit të Punëve të Jashtme të BE-së.